Salafızmdi zańmen tyıym salýǵa kelgende basqa standarttardy alǵa tartý durys emes - Qaırat Joldybaıuly
«Búgingi zań jobasynda menińshe, terrorlyq aktilerdiń aldyn alýǵa baǵyttalǵan zań normalary kóbirek qarastyrylǵan dep oılaımyn. Ekstremızm, shekten shyǵý, qoǵam arasyna iritki salý, adamdardy qatygezdikke tárbıeleýge qatysty normalar tıisti deńgeıde qarastyrylmaǵan. Meniń pikirimshe, qoǵam osyny kútip otyr. Árıne, qarý-jaraqty, kóshi-qondy qadaǵalaý durys. Qarýdy shekteý kerek. Alaıda, sana ekstremızmge daıyn bolsa, oǵan qandaı da bir qarýdyń qajeti de shamaly. Buǵan bir ǵana mysal Frantsııada júk kóligimen de jurtty taptap óte shyqqanyn bilesizder», - dedi Qaırat Joldybaıuly.
Bul rette din mamany ekstremızmmen kúres jaǵyn qataıtýdyń qajettigin alǵa tartady. Sonymen qatar, Qaırat Joldybaıuly ınternet saıttary arqyly áli kúnge túrli ekstremıstik baǵyttaǵy kitaptardyń, ádebıetterdiń órip júrgenine toqtaldy. Onyń aıtýynsha, bul jaǵyn da kóbirek qadaǵalaý kerek.
«Árıne, ıdeologııaǵa ıdeologııamen qarsy turamyz degen durys. Alaıda, Qazaqstanda buryn «Tablıǵı jamaǵat» degen aǵym bolǵan, ol ıdeologııa, esh jerde tirkelmegen aǵym edi. Osyǵan biz zań arqyly tosqaýyl qoıdyq, tyıym saldyq. Al endi týra sol sekildi salafızm aǵymyna kelgende biz basqa standarttar oılap ketemiz. Nege bulaı? Ideologııaǵa qarsy kúres úshin de memleketten qoldaý da kerek, qarajat ta bólinýi kerek. Osyny eskerseńizder», - dedi Q. Joldybaıuly.
