Salafıler óz tanymyn ǵana tyqpalap, psıhologııalyq qysymǵa negizdelgen rýhanı ekspansııa júrgizýde - B. Smaǵul
ASTANA. 8 qańtar. QazAqparat - Elimizde salafıler óz tanymyn ǵana tyqpalap, erkin suhbatqa emes, psıhologııalyq qysymǵa negizdelgen rýhanı ekspansııasyn júrgizip otyr.
Búgin Nurlan Nyǵmatýlınniń tóraǵalyǵymen ótken Parlament Májilisiniń jalpy otyrysynda QR Premer-Mınıstriniń, QR Bas prokýrorynyń atyna saýal joldaǵan depýtat Baqytbek Smaǵul osylaı málimdedi.
Saýalda depýtat jaqynda qyzmet babymen aımaqtarǵa baryp, halyqtyń muń-muqtajymen tanysý barysynda óńirlerdiń birligin buzyp otyrǵan dinı aǵymdarǵa qanyǵyp qaıtqanyn alǵa tartty. B. Smaǵuldyń aıtýynsha, ýaqyt ótken saıyn máseleniń ýshyǵyp bara jatqanyn endi ashyq aıtqan oryndy. Sebebi mundaı úlken problemany búgin toqtatpasaq, erteń elimizdiń qaýipsizdigine úlken qater.
«Qoǵamda ǵasyrlar boıy qalyptasqan dinimizdi ıslamǵa jat dúnıetanymdaǵy aǵym retinde kórsetý beleń alyp barady. Búgin ýahabtyq aǵymyndaǵy mıssıonerler qazaqtyń musylmandyq túsinigine, onyń tarıh boıy jınaqtalǵan bolmysyna aınalǵan túsinik-tanymyn joqqa shyǵaryp baǵýda. Bul degenimiz zardaby keshegi kommýnıstik ıdeologııa júrgizgen ultsyzdandyrý saıasatynan da asyp túsetin qasiret. Bular qazaqty búgin ǵana musylmandyqty qabyldaǵan el sekildi kórsetip, ózderin taza ıslam atynan, keı jerlerde Allanyń atynan sóılep, halyqty dinı senimi men tanymynan bezdirýge jumys isteýde. Demek, bular halqymyzdyń san ǵasyrlyq tarıhy men dinı tájirıbesin joqqa shyǵarýdy maqsat tutqan. Bul naǵyz revolıýtsııalyq úderis. Al ıslam rýhynda revolıýtsııa emes, evolıýtsııa bar ekenin salafıler sezinbeıdi de», - deıdi Baqytbek Smaǵul.
Depýtattyń paıymynsha, salafıler óz tanymyn ǵana tyqpalap, erkin suhbatqa emes, psıhologııalyq qysymǵa negizdelgen rýhanı ekspansııasyn júrgizip otyr. Al bunyń elimizdiń zaıyrly ustanymyna qaıshy áreket ekenin aıtqan B. Smaǵul, zaıyrlylyq túsinigine anyqtama berip, onyń normatıvtik-quqyqtyq aktilerdegi fýnktsııalaryn qaıta qarastyrmasa aǵymdardy aıtaqtaǵan syrttaǵy yqpal el táýelsizdigine qaýip ákelmek.
«Salafıler teatr, óner, týǵan kún toılaýǵa qarsy, ony kúná dep esepteıdi. Bular ýahabı aǵymyndaǵylar úshin Allaǵa serik qosý, dinge jańalyq qosý. Olar betashar sekildi salt-dástúrlerimizge tyıym salýda. Sharıǵatqa emes, Konstıtýtsııaǵa baǵynǵan adamdy bir Qudaıǵa sený formýlasyn buzǵany úshin kóp qudaıǵa tabynýshy kápirdiń bir túri retinde qaraıdy. Osynyń ózi elimizdiń erteńin qurtyp, búlik shyǵarýǵa negiz bolatyn ıdeologııalyq keńistik. AQSh áskerin Aýǵanstannan áketken jaǵdaıda elimizdiń turaqtylyǵyna keri áserin tıgizýdi kózdeıtin maqsat dep bilgen jón. Ǵasyrlar boıy qalyptasqan ómir-saltymyzǵa revızııa jasap, ulttyq qaýipsizdigimizge orasan zardaptaryn tıgizip jatyr», - degen depýtat Úkimet basshysy men Bas prokýratýra aldyna birqatar máseleni kóldeneń tartty.
«Memleket jáne din arasyndaǵy qatynas naqty emes, memleket tarapynan din konstıtýtsııalyq sheńberde qubylys retinde qabyldanbaǵan. Konstıtýtsııada ár adamnyń din tańdaýynan ózge naqty kategorııa qalyptaspaǵan», - deıdi depýtat B. Smaǵul.
