Salvadordyń eks-prezıdenti 10 jylǵa sottaldy
ASTANA. QazAqparat - Salvadordyń burynǵy prezıdenti Antonıo Saka aqsha bopsalady jáne memlekettiń 300 mln AQSh dollaryna jýyq qarajatyn jymqyrdy degen aıyppen 10 jylǵa bas bostandyǵynan aıyryldy, dep habarlaıdy Reuters agenttigi.
Saka ár aıyptaý boıynsha 5 jyl merzimge bas bostandyǵynan aıyrylǵan. Budan tys, sot ony 260 mln dollardy memleketke qaıtarýǵa mindettedi.
Burynǵy prezıdentpen birge onyń úkimetiniń alty múshesi de sybaılas jemqorlyqqa qatysqany úshin 3 jyldan 16 jylǵa deıingi merzimge sottaldy.
Eks-prezıdent ótken aıda túrme merzimin qysqartýǵa úmittenip, sot taǵyp otyrǵan aıyptardy moıyndaǵan edi.
Ortalyq Amerıkadaǵy respýblıkany 2004-2009 jyldar aralyǵynda basqarǵan Antonıo Saka 2016 jyldyń qazanynda óz ulynyń úılený toıynda ustalǵan bolatyn.
