Salvadorda stadıon kireberisinde keptelgen 12 adam qaza tapty
SAN-SALЬVADOR. QazAqparat – Salvador astanasy San-Salvadordaǵy fýtbol stadıonynyń kireberisinde keptelgen 12 adam qaza tapty, dep habarlady resmı tulǵalar. Bul týraly QazAqparat» Bı-Bı-Sı-ge silteme jasap habarlaıdy.
Oqıǵa Cuscatlán stadıonynda jergilikti Alianza komandasy men Santa-Anadan kelgen Fas komandasy arasyndaǵy match kezinde boldy. Match ýaqytsha toqtatylǵan.
Prezıdent Naııb Býkele mundaı oqıǵa buryn-sońdy bolmaǵanyn aıtyp, «tolyq tergeý» bastalǵanyn málim etti.
Polıtsııanyń habarlaýynsha, qaza tapqandar arasynda jeti er adam men eki áıel bar. Olardyń barlyǵy 18 jastan asqan.
Málim etilgendeı, oqıǵa stadıonǵa kirý jabylǵannan keıin kóptegen jankúıerdiń ishke ótýge árekettengen kezinde oryn alǵan.
Bılik paıymynsha, keıbir jankúıerlerge jalǵan bıletter satylǵan. Osyǵan oraı tergeý bastalǵan.
Sondaı-aq sheneýnikter jaraqat alǵan 90 adamǵa medıtsınalyq kómek kórsetilgenin málimdedi. Olardyń arasynda balalar da bar.
«Salvador azamattyq qorǵanys» uıymynyń ókili Lýıs Alonso Amaııanyń aıtýynsha, 500-ge jýyq adamǵa medıtsınalyq kómek kórsetildi, kópshiligi aýrýhanaǵa jetkizildi.
