Salvadorda gangsterlerge arnalǵan túrme ashyldy
ASTANA. QazAqparat – Salvadordaǵy jańa iri túrmege alǵashqy eki myń jazasyn óteýshi keldi, dep habarlaıdy QazAqparat BBC-ge silteme jasap.
Bul túrme is júzinde el prezıdenti Naııb Býkele jarııalaǵan qylmysqa qarsy soǵystyń epıtsentri.
Naýryzdan bastap Salvadorda tótenshe jaǵdaı rejımi engiziledi - bul bıliktiń bandıttik toptar jasaǵan zorlyq-zombylyq pen kisi óltirýge bergen jaýaby. Polıtsııanyń kóptegen arnaıy operatsııalary nátıjesinde gangster toptaryna qatysy bar degen on myńdaǵan kúdikti ustaldy.
Terrorızmge qarsy kúres ortalyǵy dep atalatyn iri túrme 40 myń orynǵa arnalǵan.
Sottalýshylardy kameraǵa alyp barmas buryn qoldaryn basyna qoıyp otyrǵyzyp, shashtaryn qyryp alyp tastaıdy.
Prezıdent Býkele Twitter-ge túrmedegi sottalýshylardyń vıdeosyn alyp, mynadaı jazba qaldyrdy: «Búgin tańda bandanyń 2 myń múshesin Terrorızmge qarsy kúres ortalyǵyna aýystyrdyq. Bul olardyń jańa úıi bolady, onda olar bári aralasyp, ondaǵan jyldar boıy ómir súredi jáne halyqqa endi zııan tıgize almaıdy».
Jańa gangster túrmesi Tekolýka mýnıtsıpalıtetiniń oqshaýlanǵan jerinde, el astanasynan 74 shaqyrym jerde salynǵan. Bul - Latyn Amerıkasyndaǵy osyndaı eń úlken qurylym. Qylmyskerler qashyp ketpes úshin eń jańa tehnologııalarmen jabdyqtalǵan.
Túrmeniń segiz ǵımaraty bar, árqaısysynda 100 sharshy metrdi qamtıtyn 32 iri kamera bar. Onda júzdegen sottalýshy otyrady. Ár kamerada eki qol jýǵysh pen eki týalet bar. Salvador prezıdenti qabyldaǵan tótenshe sharany kóptegen adamdar azamattardyń konstıtýtsııalyq quqyǵyn shekteıdi dep esepteıdi. Atap aıtqanda, kúshtik qurylymdarǵa orderdi kútpesten kúdiktilerdi birden qamaýǵa alýǵa ruqsat berdi.
Antıgangsterlik soǵys barysynda Salvador bıligi 64 myń adamdy ustady.
