Salvador stadıonyna kireberiste keptelip qalǵan 12 jankúıer qaza tapty
SALЬVADOR. QazAqparat - Jergilikti bılik málimetinshe, Salvador astanasy San-Salvadordaǵy fýtbol stadıonynda kem degende 12 adam qaza tapqan. Bul jaıynda QazAqparat BBC agenttigine silteme jasap habarlaıdy.
Oqıǵa Cuscatlán stadıonynda jergilikti Alianza jáne Santa Ananyń Fas komandasy arasyndaǵy match kezinde boldy. Oıyn ortasynan toqtatyldy.
Prezıdent Naııb Býkele mundaı oqıǵa buryn-sońdy bolmaǵanyn, egjeı-tegjeıli tergeý bastalǵanyn málimdedi.
Polıtsııa buǵan deıin qaıtys bolǵandardyń arasynda jeti er adam men eki áıel bar dep málimdegen. Onyń barlyǵy 18 jastan asqan.
Kireberis esik jabylǵannan keıin syrtta qalǵan jankúıerler jappaı stadıonǵa kirýge umtylǵan. Sodan keıin osyndaı keptelis paıda bolǵan.
Bıliktiń málimetinshe, keıbir jankúıerler jalǵan bılet satqan bolýy múmkin, tergeý munyń ras-ótirigin anyqtaıdy.
Jergilikti BAQ jarııalaǵan kadrlardan jankúıerlerdiń stadıonnyń kireberisindegi kedergilerdi buzý úshin jantalasyp jatqanyn kórýge bolady.
YouTube-tegi tikeleı efırden trıbýnada tártipsizdik bastalǵannan keıin match toqtatylǵany kórinip tur.
Basqa kadrlarda qutqarýshylar adamdardy zembilge salyp áketip bara jatyr. Sondaı-aq, jankúıerlerdiń jerde jatqan adamdardyń betin fýtbolkamen jelpip, tynys alýyna kómektesip jatqan kórinister bar.
«Lek-lek bolǵan jankúıerler joıqyn kóshkin sekildi qaqpany buzyp ótti, - deıdi Rescue Commandos jedel kómek tobynyń eriktisi. - Keıbireýler týnneldegi úıindiniń astynda qalyp qoıdy. Taǵy bireýler trıbýnaǵa, sodan keıin alańǵa kirip úlgerdi, biraq aýa jetpeı tunshyǵyp jatty».
Prezıdent Býkele komandalar, menedjerler, stadıon sheneýnikteri, fýtbol lıgasy jáne Salvador fýtbol federatsııasynyń is-áreketi muqııat zerdelenip, tergeletinin aıtty.
«Kináli kim bolsa da, ol jazasyz qalmaıdy», - dedi ol Twitter-de.
Zardap shekkenderge kómektesý úshin qutqarý qyzmetin tartýǵa týra keldi.
Sondaı-aq, sheneýnikter jaraqat alǵan 90 shaqty adamǵa medıtsınalyq kómek kórsetilgenin habarlady.
«Salvadordyń azamattyq qorǵanysy» uıymynyń qyzmetkeri Lýıs Alonso Amaıanyń aıtýynsha, 500-ge jýyq adam medıtsınalyq kómek aldy, onyń kópshiligin aýrýhanaǵa jetkizýge týra keldi.
Densaýlyq saqtaý mınıstri Frantsısko Alabı jaralanǵandardyń kópshiliginiń jaǵdaıy turaqty ekenin jáne aýrýhanalardan ólim-jitim týraly habarlanbaǵanyn aıtty.
Salvador fýtbol federatsııasy jeksenbidegi búkil ulttyq fýtbol oıyndaryn keıingi qaldyrdy jáne marqumdardyń otbasyna kóńil aıtty.
