Sal-serilerdiń aýyly qandaı kúıde? - «Egemen Qazaqstan» gazeti
ASTANA. QazAqparat - «Egemen Qazaqstan» gazetiniń búgingi sany Memleket basshysy Nursultan Nazarbaevtyń resmı kezdesýlerinen aqpar berýmen ashylǵan. Odan keıin Ómir Esqalıdiń «Sal-serilerdiń aýyly qandaı kúıde?» degen taqyryppen berilgen maqalada avtor óz zamanynyń maqtanyshyna aınalǵan tulǵalardyń taǵdyr-talaıy týraly aıta kele, Birjan saldyń týǵan jerine qatysty derekti naqtylaı túsedi.
Gazettiń ekinshi betinde jarııalanǵan Darhan Qydyráliniń «Túgel túrkiniń tutqasy» atty maqalasynda Elbasynyń el táýelsizdigi jyldaryndaǵy eren eńbegi men túbi bir túrki álemindegi abyroı-bedeli jóninde áńgime órbitedi.
Al Aqtóbe oblysyndaǵy basylymnyń menshikti tilshisi Temir Qusaıynnyń «Aýylym meniń Qobdada...» taqyrybymen jazylǵan materıalda óńirdegi aýyl-aımaqtyń tynys-tirshiliginen habar beredi. Sonymen qatar, gazettiń bul sanynda Arqanyń Aqqyzynan, Alashtyń Aqqyzyna aınalǵan kúıshi Aqqyz Ahmetqyzynyń 120 jyldyǵyna oraı Arqa tósinde ótken aıtýly keshten aqpar usynylǵan. Avtory - basylymnyń Qaraǵandy oblysyndaǵy menshikti tilshisi Hamıt Esaman.
Beken Qaıratulynyń «Arǵy betke asqan Alash arysy» degen ataýmen oqyrman nazaryna usynylǵan materıalda kezinde «kózi ashyq, kókiregi oıaý» ári baq-dáýletti bolǵany úshin qýǵanǵa ushyrap, qorlyq kórgen qazaqtyń bir áýleti jaıynda aıtylady. Zertteý maqalanyń keıipkeri - Ábdikárim Erejepovtiń júrip ótken joly men artynda qalǵan izi jáne onyń urpaqtary jóninde áńgime órbıdi.
«Tender tóńiregindegi túıtkilder» maqalasynda tilshi Ǵalymjan Elshibaı memlekettik satyp alý qyzmetin maıshelpekke aınaldyrǵan mekemeler men jón-josyqsyz talap-tilekter týrasynda sóz saptaıdy. Bir aıta keterligi, osy taqyrypqa oraı salynǵan gazet sýretshisi Aıdarbek Ǵazızulynyń qylqalamynan shyqqan týyndysy da oqyrman ezýin eriksiz tartqyzatyndaı.
Juma kúnge arnalǵan «Egemen Qazaqstan» gazetiniń bul nómirinde eldiń ishki-syrtqy saıasatyna qatysty mańyzdy aqparattar men ózekti máseleler de qamtylǵan.
