Sal aýrýynan balasyn emdetý úshin aqtóbelikter kvotany birneshe jyl kútýge májbúr
AQTÓBE. QazAqparat - Sal aýrýyna shaldyqqan balalardyń ata-analary ózderimen tikeleı jumys isteıtin mamandarmen betpe-bet kezdesti. Olar jórgek alý, arba, aıaq kıim jáne jyldar boıy kezegi kelmeıtin kvota máselesin qozǵady, dep habarlaıdy QazAqparat tilshisi.
Aqtóbe qalalyq sal aýrýyna shaldyqqan azamattardy qoldaý ortalyǵyna búgin balasy osy syrqatqa shaldyqqan ata-analar jınaldy. Olar birneshe máseleni bılikke jetkizý úshin kezdesý uıymdastyrdy.
«Eki jyl buryn erekshe balalardyń ata-analary birigip, ózara tájirıbe almasý úshin top qurǵan edik. Qazir 203 adam bar. Olardyń kóbi Aqtóbeden, on paıyzy elimizdiń basqa óńirinen tirkelip otyr. Biz jalǵyz júrip máseleni bılikke jetkize almaǵan soń biriktik. Sal aýrýyna shaldyqqan, aýtızm, Daýn sındromymen aýyratyn balalardyń ata-analary atynan birneshe másele qozǵaımyn. Birinshiden, múgedek balasy bar ata-analarǵa ýaqytsha baspana kerek. Keıbir jaǵdaıda kúıeýi otbasyn tastap ketedi. Jalǵyzbasty analar balasynyń emi úshin alatyn járdemaqysyn páterge berýge májbúr bolyp otyr. Ekinshiden, jylyna 700-den astam jórgek beriledi. Bir kúnge eki dana jórgek qajet dep eseptep, qosymsha shyǵynymyzdy kóbeıtti. Biz alyp júrgen balalar arbasy óte aýyr, yńǵaısyz. Dári-dármek te ýaqytyly berilmeıdi»,- dedi kezdesýdi uıymdastyrýshy Gúlsaıa Ybyraeva.
Al sal aýrýyna shaldyqqan 8 jastaǵy Aıdostyń ákesi Serik Jumabaev balasyna kvota ala almaı júr. Ol 5 jyldan beri ońaltý ortalyqtaryna barmaǵanyn aıtyp otyr.
«Astana qalasyndaǵy ońaltý ortalyǵyna barý úshin kvota kezegine turyp, kútip júrmiz. 2012 jyldan beri «ózimiz habarlasamyz» dep aıtady. Balam jylyna eki ret oblystyq balalar aýrýhanasyna jatady. Ol jerde dárýmen alyp, ashýdy basatyn ekpe beredi. Al aýrýhanadan shyqqan kezde eń qajetti degen, sol jerde iship, qabyldaýy tıis dárigerdiń tizimin jasap, qolymyzǵa ustatady»,- dedi Serik Jumabaev.
Sal aýrýyna shaldyqqan balanyń ákesi nevropatolog dárigerdiń jumysyna kóńili tolmaıdy. Bul otbasy Kókshetaýǵa beriletin kvotany alyp, em qabyldaýdy jón kóredi. «Qysta, jazda memlekettik satyp alý máselesi týyndap, keıde dárini óz qarjymyzǵa satyp alamyz. Bul biz úshin úlken shyǵyn. Balanyń kútimine alatyn aqshamyzdyń bári dárige ketip, keıde jetpeı qalady»,- dedi ol.
Basshylarmen kezdesýge eki múgedek balasy bar Meırambek Tóleýov ta keldi. Týa bitti sal aýrýyna shaldyqqan balalardyń biri beste, ekinshisi 8 jasta. Tóleýovtar otbasy da arba alý, kvotamen emdelý máselesin qozǵady.
«Páter máselesi - óte ózekti. Páter kezegi kelgenshe ýaqytsha baspana berý usynysyn ákimdiktegi komıssııa qarap jatyr. Al jórgek berý máselesi kezinde ata-analardan usynys túsken soń QR Parlament Májilisinde otyrǵan depýtattarǵa hat joldaımyz. Buryn osy másele oń sheshilip, 48 dana jórgektiń ornyna 730 jórgek berildi. Al balalar arbasy týraly usynys memlekettik tapsyrys kezinde eskeriledi», - dedi Aqtóbe qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva.
Aıta keteıik, jıynǵa qatysqan ár ata-ana óz balasynyń máselesin aıtyp, usynystaryn tizbektedi. Al Aqtóbe qalalyq sal aýrýyna shaldyqqan azamattardy qoldaý ortalyǵynyń jetekshisi Quralaı Baımenova múgedek bala óz betimen ómir súrý úshin barlyq jaǵdaıdy jasaýǵa qol jetkizý joldaryn aıtty. Sebebi, anasy men ákesi qartaıyp, ómirden ótken kezde de balany memleket qaraýyna qaldyratyn múmkindik jasalýy kerek. Statıstıkalyq málimetke súıensek, qazir oblysta 21 myńnan astam múgedek bar. Onyń 5 myńnan astamy bala. 
