Sal aýrýyna shaldyqqan tarazdyq danyshpan bala Isaak Mýstopýlo oblys ákimimen kezdesti
TARAZ. QazAqparat – Jambyl oblysynyń ákimi Asqar Myrzahmetov tarazdyq danyshpan bala Isaak Mýstopýlomen kezdesti, - dep habarlaıdy QazAqparat.
Oblys basshysymen kezdesýge jas ǵalym anasy Maıra Talǵatqyzymen birge keldi. Kezdesýde aımaq basshysy erekshe qabiletti jasóspirimmen túrli baǵytta oı bólisip, óńirdegi daryndy jastarǵa qashanda qoldaý kórsetýge daıyn ekendigin jetkizdi. Bul týraly oblys ákiminiń baspasóz hatshysy Gúlsara Muhtarqulova óziniń áleýmettik jelidegi Facebook-paraqshasynda jazdy.
«Asqar Myrzahmetov jaqynda ashylǵan Sh.Murtaza atyndaǵy «Rýhanııat jáne tarıhtaný» ortalyǵynda ǵylym qýǵan daryndy jastar úshin úıirme nemese klýb uıymdastyrý týraly usynysyn jetkizip, oǵan jas ǵalymnyń barynsha atsalysýyn surady. Onda jastar óz ıdeıalaryn maqsatty júzege asyrýǵa, tek qana ǵylym salasynda emes, sonymen qatar mádenıetti damytý, jas urpaq arasynda rýhanı qundylyqtardy nasıhattaý máseleleri boıynsha da pikir almasyp, talqylaýǵa zor múmkindik týmaq»,-delingen baspasóz hatshysynyń jazbasynda.
Óz kezeginde Isaak ta aımaq basshysynyń bastamasyn qýana qoldaıtynyn bildirgen. Sebebi, ol óz mektebiniń qabyrǵasynda osyndaı nárse uıymdastyrýǵa tyrysyp júr eken.
«Eger klýbty oblys kóleminde uıymdastyratyn bolsa, onda jastar úshin keń perspektıvalarǵa jol ashylatyn bolady», - degen jas ǵalym qýanyshyn jasyra almady.
Kezdesý sońynda oblys ákimi Isaak Mýstopýlony Jambyl oblysynyń tarıhy toptastyrylǵan fotoalbom syılap, oǵan zor densaýlyq jáne iri ǵylymı jetistikter tiledi.
Aıta keteıik, Isaak Mýstopýlo - «Úılesim teorııasy» jobasynyń avtory. Ol Taraz qalasynda týǵan. Týmysynan sal aýrýyna shaldyqsa da, ǵylym-bilim jolynda eshqandaı kedergi bolmaý keregin Hokıngten keıin dáleldegen tulǵa retinde tarıhta qalýy bek múmkin. 15 jasynda ǵarysh kemelerine arnalǵan elektroenergııany óndirý joldaryn paıymdaǵan. Osydan keıin áıgili ulybrıtanııalyq astrofızık, professor Stıven Hokıngpen kezdesken bolatyn.
Jas ǵalymnyń jetistikteri de az emes. Isaak Brıtan Keńesi men National Agency for Technological Development uıymdastyrǵan múmkindigi shekteýli jandarǵa arnalaǵan STEM ulttyq ınnovatsııa konkýrsynda «Úılesim teorııasy» atty vıdeorolıgi úshin arnaıy júldege ıe bolǵan. Óz vıdeosynda ol ǵarysh apparattary úshin elektr qýatyn óndirý jolyn sıpattap bergen.
Sondaı-aq ótken jyldyń qarasha aıynda Ońtústik Koreıanyń Pýsan qalasynda ótken Global IT Challenge 2019 halyqaralyq konkýrsynyń jeńimpaz atanǵan.
LG kompanııasynyń aıryqsha muqtajdyǵy bar balalarǵa arnalǵan aqparattyq tehnologııalar salasyndaǵy bul baıqaýǵa 23 elden 300 úmitker qatysty. Jerlesimiz aqparattyq tehnologııa salasyndaǵy eń úzdik IT-mamandar ishinen «eLifeMap» atalymynda top jaryp, «Best Award» Bas júldesin jeńip aldy.
