Sal aýrýyna shaldyqqan elordalyq jigit karateden qara beldik ıegeri atandy

Aıdos Medıanov 1988 jyly 2 qyrkúıekte Aqmola oblysynda dúnıege kelgen. Jaryq dúnıe esigin ashqan kezde omyrtqasyna zaqym kelip, 13 jyl boıy júre almaǵan.

«Bala kezimnen jattyǵýmen aınalysamyn. Karatemen aınalysqanyma 8 jyl boldy. «Osymen toqtaǵanyń durys bolar« dep aıtqan dostarym da boldy, biraq men namysqa tyrysyp, bastaǵan isti sońyna deıin jetkizýdi jón sanaıtyn adammyn. Bul sport túrinen bas tartý týraly oı mıyma kelip kórmegen. Jattyǵýmen aınalyspaǵan kúnimdi kóz aldyma elestete almaımyn»», - deıdi Aıdos Medıanov.

Ol karate mektebine aptasyna úsh ret baryp, bir jarym saǵattan jattyǵady. Úıge barǵan soń taǵy da 2 saǵat jattyǵýdy ádetke aınaldyrǵan.

«Ustazym maǵan senedi, alǵa qoıǵan maqsatyma jetý múmkindigim kóp ekenin aıtady. Qazirgi ýaqytta elordadaǵy D.Qonaev atyndaǵy kolledjde zańger mamandyǵy boıynsha 2-kýrsta oqımyn. Qashyqtan oqıtyndyqtan, toptastarymdy jaqyn tanymaımyn. Negizgi dostarym osy jerde. Bul jer - meniń ekinshi otbasyma aınalyp ketti», - deıdi ol.

Onyń aıtýynsha, ol kıokýshınkaı karateni tańdamaǵan, kerisinshe kıokýshınkaı jekpe-jegi ony tańdaǵan.

«Men 8 jyl buryn jekpe-jektiń basqa túrlerimen aınalysqym kelgen. Eshbir jattyqtyrýshy menimen jumys istegisi kelmedi. Rústem Sultanbekov aǵa ǵana menimen jumys isteýge táýekel etti. Basqa emes, dál osy jerdiń esigi men úshin ashyq bolǵany - bul jekpe-jek túri maǵan arnalǵany shyǵar», - deıdi Aıdos.

Ol karate mektebine kelgen kezde múgedek arbasynda otyrǵanyn, mektepke ony baýyry arqalap alyp kelgenin aıtty.

«Ol kezde eki baldaqtyń súıemeldeýinsiz júre almaıtynmyn. Mektepke baýyrymnyń arqasyna otyryp keldim. Qazir bir baldaqtyń kómegimen júre alamyn, jattyǵý zalynda baldaqsyz júretin kezderim de bolady. Bul - meniń úlken jetistigim», - deıdi ol.

Aıdos búgin qara belbeý aldy.

«Bul - meniń asqaq armanym, aıqyn maqsatym edi. Sal aýrýyna shaldyqqan eshbir adam shyǵys jekpe-jeginen qara beldik alyp kórmegen. Men adam baǵyndyra almaıtyn shyń bolmaıtynyn óz-ózime dáleldegim keldi jáne úıde múgedek arbasyna tanylyp otyrǵandarǵa rýh syılaǵym keldi. Ómirdi jaqsy jaqqa ózgertý ár adamnyń óz qolynda. Mine, osy maqsatyma jettim, endi ekinshi, úshinshi, tórtinshi dandy alǵym keledi. (Dan - japondyq jekpe-jek ónerindegi dáreje). Bolashaqta Japonııaǵa baryp, osy shyǵys ónerimen aınalysýdy jalǵastyrǵym keledi. Ol úshin qazirgi ýaqytta japon tilin úırenip júrmin. Qara belbeý alýym meniń jáne ustazymnyń eńbeginiń, anam men dostarymnyń qoldaý kórsetýiniń nátıjesi», - deıdi Aıdos.

Ol taǵdyr joly ózine uqsas adamdarǵa keńes aıtty.

«Eń aldymen adam óz-ózine senimdi bolýy kerek. Minezdi bolmasań - maqsatqa jetpeısiń. Men ózimdi eshqashan ózgeden kem adam sanap kórgen emespin. Ómirde neshe túrli qıyndyq bolady, biraq adam óz ózin jigerlendire almasa esh nátıje bolmaıdy. Qandaı jerge barsań da, qandaı ortada júrseń de eńseńdi túsirmeı, rýhyń berik bolýy kerek. Men týǵan kezde múgedek adamdarǵa qoǵamnyń kózqarasy basqasha bolǵan, qazirgi ýaqytta kóp nárse ózgerdi. Densaýlyǵyńda aqaý bolǵanmen, óner, bilim, parasatyńmen kez kelgen adamdy moıyndatýǵa bolady. Ana tilim, orys tilimen shektelmeı, aǵylshyn, qytaı, ıspan, japon tilin meńgerip jatyrmyn. Bul - zaman talaby», - deıdi ol.

Onyń ustazy, elordadaǵy karate mektebiniń negizin qalaýshy Rústem Sultanbekov shákirtimen tanysqan kezdi esine aldy.

«Pavlodar qalasynda men sal aýrýyna shaldyqqan balamen jumys istep kórgenmin. Múgedekter arbasynda otyratyn Igor Shıller shyǵys jekpe-jegimen aınalysqannan keıin óz kúshimen júre bastady. Qazir ol 26 jasta. Men elordaǵa kóship ketkendikten, onyń dárejesin qara beldik alýǵa deıin jetkize almadym. Aıdosty baýyry meniń aldyma arqalap alyp kelgen edi. Barlyq jattyqtyrýshy onymen jumys isteýden bas tartqanyn aıtty. Men Aıdosqa eki suraq qana qoıdym. «Bul jol sen úshin jeńil bolmaıdy. Saǵan eshqandaı artyqshylyq bermeımin. Basqalarmen teń jattyǵasyń. Osyǵan kelisesiń be? Jattyǵýdan bir kún de qalýǵa bolmaıdy. Jattyǵýǵa ýaqytyly, keshikpeı kele alasyń ba?» dep surap edim, ol «Kelisemin, keshikpeımin» dep jaýap berdi. Sodan beri, mine, segiz jyl ótti», - deıdi Rústem Sultanbekov.

Ol sal aýrýyna shaldyqqan shákirtiniń minezi týraly aıtty.

«Aıdosta aldyna qoıǵan maqsatqa jetpeı qoımaıtyn qasıet bar. Qara beldigin qorǵaǵan kezde onyń oryndyqta otyrǵanyn qalaǵandar boldy. Aıaýshylyq sezimi týyndady, biraq men onyń minezin jaqsy bilemin, sondyqtan ol qara beldikti el qatarly qorǵaıtynyn aıttym. Ol qara beldikti qorǵaý jattyǵýlaryn bes saǵat boıy eshbir kómekshi quralsyz óz kúshimen istep shyqty. Oǵan qarap turý maǵan ońaı bolǵan joq, degenmen onymen birge jumys istegen 8 jylda meniń keýdeme onyń erik-jigeri myqty ekeni týraly senim uıalaǵan. Birinshi dárejeli qara beldikti qorǵaý ózim úshin de ońaı bolǵan joq edi. Bul - óte mańyzdy, jaýapkershilikti talap etetin synaq. Biraq onyń jany da, táni de qara beldikti qorǵaýǵa daıyn boldy. Aıdos - júregi taza adam. Ony jattyǵý zalynan kórgen kezde men shabyttanyp ketemin. Onymen jumys isteý arqyly sabyrly, shydamdy bolýǵa úırendim. Aıdos karate mektebine kelýshilerge qoıylatyn talaptyń joǵary bolýyna yqpal etti. On eki múshesi saý adam jattyǵýǵa kelmeı qalsa qatty ashýlanyp, Aıdosty olarǵa úlgi etemin. Sebebi ol jattyǵýǵa qalmaı keledi. Birde ákesi, birde anasy, endi birde baýyry alyp kelse, endi birde taksımen keledi. Ol jyl mezgiline, ystyq-sýyqqa qaramaıdy», - deıdi ol.

Ustazdyń shyǵys jekpe-jegin úıretýmen aınalysqanyna 24 jyl bolǵan.

«Bárine arnalǵan karate» baǵdarlamasynyń avtorymyn. Bul baǵdarlamaǵa karatemen aınalysqysy keletin, biraq qandaıda bir shekteýi bar adamdar qatysa alady. Bıyl 16 naýryzdan beri olardy onlaın rejımde jattyqtyryp jatyrmyz. Meniń jattyqtyrý ádisim óte qarapaıym. Osyndaı erekshe adamdarǵa kúsh-jiger syılap, ózgelermen teń kórseń - naǵyz batyr daıyndap shyǵarýǵa bolady», - deıdi ol.

Sondaı-aq, ustaz shákirtterin qalaı jigerlendiretinin aıtty.

«Eń aldymen olara óziń úlgi bolýyń kerek. Men 2016 jyly ardagerler arasynda karateden Eýropa chempıony atandym. Odan keıin tórtinshi dárejeli qara beldik qorǵap, Japonııada 40 jekpe-jek ótkizdim. Osylaısha shákirtterime ózim úlgi bolsam, olar maǵan qarap boı túzeıdi», - deıdi ol.