Sal aýrýyna shaldyqqan boıjetken kınoǵa túspek
ALMATY. QazAqparat - «ARDI» sal aýrýyna shaldyqqan balalar qoǵamynyń tárbıelenýshileri Dınara Sháripova men Tahır Omarov kınoǵa túspek. Áleýmettik jobany «Qazaqfılm» kınostýdııasy qolǵa aldy, dep habarlaıdy QazAqparat.
Múmkindigi shekteýli jandar týraly áleýmettik fılm QR Mádenıet jáne sport mınıstrliginiń tapsyrysy boıynsha túsirilmek.
«Qyz ben Teńiz» fılminde tserebraldy sal aýrýymen aýyratyn Ásel esimdi boıjetkenniń ómiri baıandalady. Onyń bar armany - mahabbatyn kezdestirip, otbasyn qurý. Ýaqyt óte Ásel BTsP-men aýyratyn Tahır esimdi jigitti kezdestirip, ómiri ózgeredi. Fılmniń rejısserleri ári stsenarıı avtorlary - Muhamed Mamyrbekov jáne Ázızjan Zaırov.
«Qyz ben teńiz» fılmi - múmkindigi shekteýli jastardyń ómirin baıandaıtyn «Sheksiz múmkindik» dılogııasynyń ekinshi bólimi. «Bolsam ba álde bolmasam ba» atty birinshi bólim arqyly biz BTsP-men aýyratyn jas jigittiń ómirin kórsetýge tyrystyq. Al osy fılmde boıjetkenniń ómirin kórsetemiz. Fılm negizine «Ardı» ońaltý ortalyǵynyń tárbıelenýshisi Dınara Sharıpovanyń ómiri alynǵan. Kartınada ol basty róldi somdaıdy. Dınara óziniń ómirge degen kózqarasymen, ómirsúıgishtigi jáne mineziniń jumsaqtyǵymen erekshelenedi. Óziniń aýrýyna qaramastan ol tolyqqandy ómir súredi. Joǵarǵy bilim alyp, qaladaǵy bankterdiń birinde jumys isteıdi. Shyǵarmashylyqqa da óte jaqyn, aıaǵymen sýretter salyp, deni saý adamdarǵa óz-ózine senýge kómektesedi. Fılmde biz onyń sheksiz ishki jan dúnıesin ashyp kórsetpekpiz, - dedi fılmniń rejısseri ári prodıýseri Ázızjan Zaırov.
Aıta ketsek, fılmde basty rólderdi «ARDI» ońaltý ortalyǵynyń oqýshylary somdaıdy. Mysaly, dılogııanyń birinshi bóliminde basty róldi somdaǵan akter, BTsP-men aýyratyn Tahır Omarov oınaıdy. Sondaı-aq, fılmge Emır Baıǵazınniń «Tórt oqıǵa» fılminde basty róldi somdaǵan Qanaǵat Tasqaraev ta túsedi.
«Bul kartına arqyly biz kórermenderge tek múgedek jastardyń ǵana emes, múmkindigi shekteýli barlyq jandardyń kúndelikti problemalaryn ashyp kórsetpekpiz. Qoǵamda óz ornyn taýyp, teń múshesi bolý úshin osyndaı adamdardyń ómirimen, tynys-tirshiligimen tanysqannan keıin, kórermen olarǵa túsinistikpen qarap, tipti ózderiniń kúshine de sene alady. Bizdiń týyndy tek múgedekterge ǵana emes, sonymen qatar barlyǵymyzǵa da art-terapııa bolmaq, - dedi rejısser Muhamed Mamyrbekov.
2017 jyldyń sáýirinen bastap rejısserlik stsenarıı jazylyp, foto jáne beıne baıqaýlar jasalyp, túsirilim lokatsııalary anyqtaldy. Ázızjan Zaırovtyń aıtýyna qaraǵanda, daıyndyq kezeńi barysynda barlyq departament ókilderimen, onyń ishinde qoıýshy sýretshimen, operator jáne jaryq túsýrishilermen úlken jumys atqarylǵan. Oǵan qosa, rejısser fılmniń akterlarynyń dıktsııasyn durys qoıý úshin, kúndelikti logopedter jumys istegenin aıtty. 
Fılm Almatyda túsirilmek.
