Sal aýrýyna shaldyqqan aqtóbelik bala Ońtústik Koreıada tegin em qabyldady

Týa bitti sal aýrýyna shaldyqqan sábı emnen soń óz erkimen eńbektep, júre alatyn boldy, dep habarlaıdy QazAqparat tilshisi.

 Ońtústik Koreıaǵa baryp tegin em qabyldaǵan balanyń ata-anasy ózderi týraly jan-jaqty aqparat berýdi qalamady. Týa bitti sal aýrýyna shaldyqqan qyzdary úshin qajetti emdi alyp, tipti shetelge emdelý múmkindigine ıe boldy. Olardyń janyna Darý ońaltý ortalyǵynyń bólim basshysy Ádemi Demeýova ere júrdi. Dáriger koreıalyq mamandardyń em jolymen tanysyp, balaǵa kútim jasaýdy meńgerdi.

«Týa bitti sal aýrýyna shaldyqqan balanyń jasy ekige keldi. Osy qyzdy emdeý týraly sheshimdi Ońtústik Koreıa eliniń dárigerleri qabyldady. Kengbýk ýnıversıtetiniń ulttyq gospıtali qaıyrymdylyq negizde tegin em júrgizdi. Shetel emhanasynda balaǵa arnap arnaıy ońaltý baǵdarlamasy daıyndaldy. Jeke dene jattyǵýy ázirlenip, dene núktelerine massaj jasaldy. Logoped jumys istep, bas-mı bóligin MRT túsirdi. Kóz, qulaq, muryn qýysyn tekserip, estý qabileti qaraldy. Ońaltý jumystary ár eldi ártúrli júrgiziledi. Dárigerlerdiń emi de ózgeshe bolady. Sondyqtan shyǵys eliniń medıtsınasyn úırený, tájirıbe almasý biz úshin mańyzdy»,- deıdi dáriger Ádemi Demeýova.

Ońtústik Koreıanyń ońaltý baǵdarlamasy eýropalyq ádiske negizdelgen. Munda balalar arasynda sırek kezdesetin aýrýlardy anyqtaý, naqty dıagnoz qoıý, emdeý, múgedek balalardy ońaltý jumystary jolǵa qoıylǵan. Shetelde tájirıbe jınap kelgen aqtóbelik mamannyń aıtýynsha, Degý qalasyndaǵy Kengbýk ýnıversıtetiniń gospıtalinde ata-anaǵa naýqas balalarǵa kútim jasaý joldary úıretiledi. Bul asa qajet tájirıbe.

«Balalar nevrologııasy, ońaltý jumystary baǵytynda mol tájirıbe jınadym. Koreıada balalar eminiń ınnovatsııalyq, zamanaýı ádisi qoldanylady. Máselen, eki jastaǵy aqtóbelik bala bir aılyq tegin emnen soń eńbektedi. Ol óz kúshimen turady, aıaq-qoly ıile bastady. Shaǵyn oıynshyqtardy qolyna ustady. Bul úlken jetistik»,- dedi dáriger Ádemi Demeýova.

Aıta keteıik, Aqtóbe oblysy ákimdigi men Ońtústik Koreıa arasynda memorandýmǵa qol qoıylǵan bolatyn. Kelisimge sáıkes aqtóbelik dárigerler Koreıada tájirıbe jınap, eki bala tegin em qabyldady. Buǵan deıin habarlaǵanymyzdaı, bir sábıdiń júregine ota jasaldy.