Sal aýrýymen aýyratyn 5 jasar Bekarystyń tusaýyn «Samuryq-Qazyna» AQ basqarýshy dırektory Darhan Qaletaev kesedi
ALMATY. QazAqparat - «Samuryq-Qazyna» AQ basqarýshy dırektory Darhan Qaletaev búgin sal aýrýymen aýyratyn 5 jasar Bekarystyń tusaýyn kesedi. Bul týraly QazAqparat tilshisine sal aýrýyna shaldyqqan balalardyń kontsertin uıymdastyrýshy, «Qasıetti jol» qorynyń ókili Aqsulý Sańǵalı aıtty.
Búldirshin bıyl Astanada ashylǵan sal aýrýymen aýyratyn balalarǵa arnalǵan ońaltý ortalyǵynda emdeý kýrsynan ótti.
Esterińizge sala keteıik, ortalyq «Samuryq-Qazyna» ál-aýqat qory men «Qasıetti jol» qaıyrymdylyq qorynyń muryndyq bolýymen ashylǵan bolatyn. Zamanaýı ortalyq qajetti qural-jabdyqtarmen, ozyq tehnologııa, basseın, massaj kabınetterimen qamtylǵan. Munda emdeýden ótken 200 balanyń arasynda múgedek arbasyn tastap, aıaǵyn táı-táı basyp júrip ketkender de bar. Solardyń arasynda 5 jasar Bekarystyń umtylysy qýantady.
Búgin atalǵan ortalyqtyń tárbıelenýshileri ózderiniń demeýshilerine alǵys retinde kontsert beredi.
Merekege «Samuryq-Qazyna» AQ basqarýshy dırektory Darhan Qaletaev, «Nur Otan» partııasynyń ókilderi, balalar úıiniń basshylary, Qazaqstan estrada juldyzdary keledi. Ómirdiń qatal synyna saǵy synbaı kele jatqan búldirshinderdi qoldaýǵa qazaqtyń tanymal ánshisi Qaraqat Ábildına men onyń án mektebi, aǵaıyndy Júginisovter óz nıetin bildirdi.
«Kózdegenimiz ár balanyń múmkindiginiń sheksiz ekendigin kórsetý, balalarǵa qoldaý bildirip, osy máselege qoǵamnyń nazaryn aýdartý. Munda balalar arbamen bı bılep, án aıtady. Tipti, sal aýrýymen aýyratyn balalar «Sarmat» tobynyń jyldam ánderine flesh-mob bıleýge de daıyn», - dedi «Qasıetti jol» qorynyń ókili Aqsulý Sanǵalı.
Merekelik kontsert Astana qalasynda Qabanbaı batyr dańǵylyndaǵy "Hillton" otelinde keshki saǵat 19:00-de ótedi.
