Sal aýrýy emdeledi: Ońtústik dárigerleri nemis tájirıbesin úırenýde
ShYMKENT. QazAqparat - Ońtústik Qazaqstan oblysyna arnaıy kelgen nemis dárigerleri múmkindigi shekteýli balalardyń qozǵalysyn damytýdy úıretýde. Halyqaralyq dárejedegi trenerler óńirdegi ońaltý ortalyqtary mamandaryn «Kınestetıks» ǵylymy boıynsha oqytyp jatyr, dep habarlaıdy QazAqparat tilshisi.
Sheteldik mamandar óńirdiń densaýlyq saqtaý basqarmasynyń shaqyrtýymen arnaıy kelgen.
Olar jýyrda ǵana ashylǵan № 1 oblystyq balalardy ońaltý ortalyǵynda óz tájirıbelerimen bólisýde. Sondaı-aq, olar tirek qımyly shektelgen jetkinshekterdiń qozǵalysyn damytýǵa jáne arttyrýǵa kómektesýde.
Óńirdegi ortalyqtardyń qyzmetkerlerine balanyń qımyl qozǵalys tásilderin úırete otyryp, olarǵa kútim jasaýdy da kórsetip jatyr. Halyqaralyq trenerler Norbert Feldmann men Kerner Lılııa oqý barysynda naýqas balalardy da qabyldap, ata analaryna keńes berýde.
Sala mamandarynyń sózine qaraǵanda, Kınestetıks ǵylymy boıynsha tájirıbe almasý elimizde alǵash ret Ońtústik Qazaqstan oblysynda qolǵa alynyp otyr. Bul ǵylym Eýropa elderinde 30 jyl buryn engizilgen. Múmkindigi shekteýli azamattarmen jumys atqaratyn barlyq medıtsına qyzmetkerleri mindetti túrde oqytylatyn ilimderdiń biri bolyp tabylady. Qozǵalys múmkindigi shekteýli azamattarǵa zamanaýı deńgeıdegi qyzmet túrin kórsetýge baǵyttalǵan shara múmkindigi shekteýli jandardyń densaýlyǵyn jaqsartýǵa, múgedektik dárejesin edáýir tómendetýge jáne múldem joıýǵa óz septigin tıgizedi.
Arnaıy jattyǵý sabaqtary qantar aıynyń 27-ine deıin jalǵasady.
