«Sakýra» turǵyn úı kesheniniń turǵyndary jylýmen qamtý máselesin sheshkeni úshin Almaty ákimine alǵys bildirdi
ALMATY. KAZINFORM – Almaty ákimi Darhan Satybaldy Bostandyq aýdanyna jasaǵan jumys sapary barysynda «Sakýra» turǵyn úı keshenine baryp, turǵyndarmen jáne basqarýshy kompanııamen kezdesti. Turǵyndardyń negizgi ótinishi — jylýmen úzdiksiz qamtý jáne keshenniń ınjenerlik júıeleriniń turaqty jumysy boldy.
Kezdesý barysynda turǵyndar jylý men sýmen jabdyqtaýdyń turaqtylyǵy jáne qazandyq jabdyqtarynyń jaǵdaıyna qatysty másele kóterdi. Qurylys kompanııasy men qalanyń tıisti qyzmeti atqarylǵan jumys týraly baıandady. Qazirgi tańda úsh qazandyq tolyq jumys istep tur. Sondaı-aq, turǵyn úı kesheni ortalyq sý júıesine qosylǵan, apatty jaǵdaı týyndaǵanda qoldanylatyn qosalqy jeli de qamtamasyz etilgen.
Budan bólek, qurylys kompanııasy gaz boıynsha bereshektiń bir bóligin ótedi, basqarýshy kompanııanyń qarjylyq mindettemelerin retteý boıynsha jumys jalǵasyp jatyr. Bereshekti óndirip alý týraly sot sheshimi oryndaldy, jaǵdaı qala tarapynan baqylaýda tur.
Qala ákimi turǵyn úı qory nysandaryn ýaqytyly qyzmet kórsetýmen qamtamasyz etý jáne turǵyndar aldyndaǵy mindettemelerdi saqtaý mańyzdy ekenin atap ótti. Tıisti basqarmalarǵa ınjenerlik júıelerdi turaqty monıtorıngten ótkizip, ótinishterge jedel jaýap berýdi jáne mundaı jaǵdaılardyń qaıtalanbaýyn qamtamasyz etýdi tapsyrdy.
Turǵyndar qalalyq qyzmetterdiń jedel aralasqany jáne jylýmen qamtýdyń qalpyna keltirilgeni úshin alǵys bildirip, júıeniń turaqtanýy oń nátıje berip jatqanyn atap ótti.
