Saqtyq kúsheıtiledi: bıyl Іle-Alataýy ulttyq parkinde 5 ret órt shyqty
ALMATY. KAZINFORM — Іle-Alataýy ulttyq parkinde orman órtiniń aldyn alý erejelerin buzǵan 35 adam ákimshilik jaýapkershilikke tartyldy.
Іle-Alataýy memlekettik ulttyq tabıǵı parkiniń stantsııa bastyǵy Erbol Temirbekovtyń aıtýynsha, 200 myń gektardan astam aýmaqty qamtıtyn parkte 2025 jyldyń basynan beri 5 orman órti tirkelgen. Jalpy órtengen alań — 0,0083 gektar.
— Parktiń órt sóndirý bólimderiniń árqaısysynda 8 adamnan turatyn 4 top qurylyp, jalpy sany 32 adam, arnaýly kıimmen, qural-jabdyqtarmen qamtamasyz etildi. Órttiń aldyn alý maqsatynda 228 shaqyrym órtke qarsy joldar jóndeldi, 78 shaqyrym mıneraldanǵan jolaqtar tazartyldy, 22 baqylaý munarasy men sonsha tikushaq alańy ornatyldy, — dedi ol.
Sonymen qatar memlekettik ınspektorlar adam bara almaıtyn qıyn aýmaqtardy barlaý úshin 131 qyzmettik atpen qamtamasyz etilgen.
— Orman órtiniń aldyn alý erejelerin buzǵan 35 adam ákimshilik jaýapkershilikke tartyldy. Jalpy aıyppul somasy — 8,7 mln teńge. Ulttyq park ınspektorlary qoqys jınaýmen aınalyspaıdy, sondyqtan demalýshylardy tazalyq saqtap, qoqys tastamaýǵa shaqyramyz, — dedi Erbol Temirbekov.
Eske salaıyq, buǵan deıin Almaty oblysynda demalys kúnderi 42 gektar qurǵaq shóp órtengenin jazǵanbyz.
«Qazáýeormanqorǵaý»