Saqtaý merzimi ótken taǵamdy satyp alǵan jaǵdaıda ne isteý kerek – maman
«Satyp alynǵan taýardyń sapasyna nemese qaıda óndirilgendigine kúmán týyndaǵan kezde «Tutynýshylardyń quqyqtaryn qorǵaý týraly» Qazaqstan Respýblıkasynyń Zańyna sáıkes tutynýshy:
- taýardyń kemshilikteri týraly talaptar qoıýǵa;
- taýar jáne daıyndaýshy týraly tolyq, senimdi aqparat alýǵa;
- satýshydan taýardyń sapasy men qaýipsizdigin rastaıtyn qujattardy talap etýge quqyǵy bar (deklaratsııalar, aýylsharýashylyǵy ónimderine veterınarlyq kýálik, veterınarlyq anyqtama t.b.)», delingen habarlamada.
Eń aldymen, taýardy dúkenge qaıtarýdan qoryqpaý kerek. Zańnama boıynsha tutynýshynyń taýarda kemshilik anyqtalǵan jaǵdaıda sol markadaǵy taýardy aýystyrýdy nemese aqshany qaıtarýdy talap etýge quqyǵy bar.
«Kóbinese saqtaý merzimi ótpegen ónimniń buzylǵandyǵy, mysaly ony saqtaý rejımin oryndamaǵan jaǵdaı oryn alady, bul da taýardy aıyrbastaýdyń nemese qaıtarýǵa sebep bola alady», delingen habaralamada.
«Jeke jáne zańdy tulǵalardyń ótinishterin qaraý tártibi týraly» QR Zańynyń 6-babyna sáıkes tutynýshy Nur-Sultan qalasynyń aýmaqtyq sanıtarııalyq- epıdemıologııalyq baqylaý basqarmalaryna adamnyń ómirine, densaýlyǵyna zııan keltirý týraly tolyq saýalnamalyq derekterdi, poshta mekenjaıyn kórsetip, qolyn qoıyp jáne naqty faktini kórsete otyryp jazbasha ótinish nemese elektrondyq tsıfrlyq qoltańba bolǵan jaǵdaıda elektrondyq úkimet portaly arqyly nemese tutynýshylardyń quqyqtaryn qorǵaý jónindegi qoǵamdyq uıymdarǵa júgine alady.
«QR Prezıdentiniń 2019 jylǵy 26 jeltoqsandaǵy «Qazaqstan Respýblıkasynda tekserýlerge jáne profılaktıkalyq baqylaý men qadaǵalaýdy baryp júrgizýge moratorıı engizý týraly» Jarlyǵyna sáıkes, shaǵyn kásipkerlik sýbektilerine, onyń ishinde mıkro kásipkerlik sýbektilerine qatysty halyqtyń ómiri men densaýlyǵyna, qorshaǵan ortaǵa, zańdylyq pen qoǵamdyq tártipke yqtımal túrde jappaı qater, týra nemese tikeleı qater tóndiretin buzýshylyqtardy boldyrmaýǵa nemese joıýǵa baǵyttalǵan tekserýler júrgizilýi múmkin, sondaı-aq saýda jelisindegi ónimniń qaýipsizdigine monıtorıngti júzege asyrý- ónimdi irikteý jáne sanıtarııalyq-epıdemıologııalyq saraptama júrgizý maqsatynda júzege asyrylady», delingen habarlamada.
Mamandar azyq-túlik ónimderin satyp alý kezinde tutynýshylarǵa birqatar keńes berdi:
-ónim týraly aqparatpen muqııat tanysyńyz, ony zattańbadaǵy tańbalaýdan nemese tutynýshylyq (zaýyttyq) qaptamadan oqýǵa bolady. Óndirýshi týraly aqparat bolýy tıis;
ónimniń daıyndalǵan kúnine jáne onyń jaramdylyq merzimine, ne ónimdi paıdalanýǵa qajet ýaqyt pen ónim paıdalanýǵa jaramdy bolatyn kúnge nazar aýdarý qajet. Árbir tutynýshy, jaramdylyq merzimi ótip ketken taýarlardy satýǵa tyıym salynatyndyǵyn bilýi tıis;
-tez buzylatyn ónimniń tek tońazytý jabdyǵy bolǵan kezde ǵana saqtalýy jáne satylýyna, tez buzylatyn ónimdi salqyndatylmaǵan jaǵdaıda saqtaýǵa jáne satýǵa tyıym salynǵanyna nazar aýdarý qajet! Saýda kásiporyndarynda sanıtarlyq erejelerdiń talaptary jıi saqtalmaıdy;
-ónimdi tańdaǵanda tez buzylatyn ónimderge tán syrtqy túrine, mıkrobıologııalyq buzylý belgilerine nazar aýdaryńyz: kógerý, ashytý, sýlaný, jeldený;
-daıyn ónimdi, mysaly, salatty satyp alǵan kezde jaramdylyq merzimine muqııat qaraý mańyzdy. Sanıtarııalyq erejeler boıynsha salattar soýs, maıonezben aralastyrylǵan túrde 3 saǵattan aspaıtyn ýaqyt saqtalady.
-tez muzdatylǵan jartylaı fabrıkattardy satyp alarda ónim deformatsııalanǵan, jabysyp qalǵanyn baıqasańyz ony satyp alýdyń qajeti joq, sebebi ol birneshe ret eritilgen, ıaǵnı sapasyn joǵaltqan jáne sizdiń densaýlyǵyńyz úshin qaýipti bolýy múmkin. Muzdatylǵan ónimderdiń saqtaý temperatýrasy mınýs 12 gradýs S-den tómen bolmaýy kerek (ónimniń tańbasynda kórsetilgen saqtaý rejımine saı bolýy kerek).
Dúkende qajetti tańdaý jasaý úshin etıketkalardy muqııat oqyńyz!
