Saqtash Hasenovtiń isi boıynsha sot talqylaýy ótetin kún belgilendi
ASTANA. QazAqparat - QR Aýyl sharýashylyǵy mınıstrligi Veterınarlyq baqylaý jáne qadaǵalaý komıtetiniń burynǵy tóraǵasy Saqtash Hasenovtiń isi boıynsha aldyn ala sot tyńdaýy ótti, dep habarlaıdy QazAqparat.
Astana qalasy qylmystyq ister boıynsha aýdanaralyq mamandandyrylǵan sotynyń tóraǵasy Ádilxan Shaıxıslamov negizgi sot talqylaýynyń ýaqytyn 1 maýsymǵa saǵat 10:30-ǵa bekitti. Saqtash Hasenovty qamaýda ustaý turaly sot sheshimi ózgerissiz qaldyryldy.
Veterınarlyq baqylaý jáne qadaǵalaý komıteti burynǵy tóraǵasyna qatysty qylmystyq is qoǵamdyq rezonans týdyrdy. Sóz qus etin Qazaqstan aýmaǵyna kedergisiz jetkizý jáne tasymaldaýǵa ruqsat berý boıynsha qylmystyq syzba uıymdastyrý faktisi jaıynda bolyp otyr.
Esterińizge sala keteıik, Sybaılas jemqorlyqqa qarsy is-qımyl ulttyq bıýrosy birneshe ret para alǵan QR AShM Veterınarııalyq baqylaý jáne qadaǵalaý komıtetiniń tóraǵasy Saqtash Hasenovti ustaǵan. Tergeý nusqasy boıynsha, Komıtet tóraǵasy buryn mınıstrlikte jumys istegen óziniń senimdi adamy E. Reshetkomen aldyn ala sóz baılasyp, Qazaqstan aýmaǵyna et ónimderin ákelýge ruqsat berý boıynsha qylmystyq shema uıymdastyrǵany anyqtalǵan. S. Hasenov belgilengen baǵa boıynsha júıeli túrde para alyp kelgen. Aıyptalýshylar kinálaryn tolyq moıyndap otyr.
