Saqtash Hasenovke para bermek bolǵan kásiporynnyń jumysy toqtatyldy
Bul týraly QazAqparat tilshisiniń suraǵyna jaýap bere otyryp, komıtet tóraǵasynyń orynbasary Tursyn Qabduldanov məlim etti.
"Bul kəsiporyn Batys Qazaqstan oblysynda ornalasqan, naryqta burynnan beri jumys istep keledi. Bul máseleni qazir quqyq qorǵaý organdary tekserip jatyr. Qazir ol kásiporynnan ónim jetkizý toqtatyldy. Kásiporyn quqyq qorǵaý organdarynyń tarapynan baqylaýǵa alyndy",-dedi T.Qabduldanov.
Esterińizge sala keteıik, 4 qarasha kúni Sybaılas jemqorlyqqa qarsy is-qımyl ulttyq bıýrosy birneshe ret para alǵan QR AShM Veterınarııalyq baqylaý jáne qadaǵalaý komıtetiniń tóraǵasy Saqtash Hasenovty ustady. Komıtet tóraǵasy S. Hasenov buryn Mınıstrlikte jumys istegen óziniń senimdi adamy E. Reshetkomen aldyn ala sóz baılasyp, Qazaqstan aýmaǵyna et ónimderin ákelýge ruqsat berý boıynsha qylmystyq shema uıymdastyrǵany anyqtaldy. S. Hasenov belgilengen baǵa boıynsha júıeli túrde para alyp otyrǵan. Sonymen, Qazaqstan aýmaǵy boıynsha 1 000 tonna qus etin kedergisiz ótkizýge ruqsat bergeni úshin «Hladolend» JShS basshylarynan 5 mln teńge kóleminde kezekti para alý barysynda Sybaılas jemqorlyqqa qarsy qyzmet S. Hasenov pen E. Reshetkony ustady. Olar kinálaryn tolyqtaı moıyndady. Qazirgi ýaqytta S. Hasenov abaqtyǵa jabyldy. Sot aldy tergeý júrgizilýde.