Saqtandyrý jáne qaıta saqtandyrý uıymdary aktıvteriniń kólemi artýda - UB
ASTANA. QazAqparat - Saqtandyrý jáne qaıta saqtandyrý uıymdary aktıvteriniń jıyntyq kólemi artýda. Bul týraly búgin Ortalyq kommýnıkatsııalar qyzmetindegi brıfıngte QR Ulttyq banki tóraǵasy Danııar Aqyshev aıtty, dep habarlaıdy QazAqparat.
«Saqtandyrý jáne qaıta saqtandyrý uıymdary aktıvteriniń jıyntyq kólemi aǵymdaǵy jyly 7,8 paıyzǵa ósip, osy 2017 jylǵy 1 qazanǵa 923,8 mlrd teńge boldy. Kompanııalardyń saqtandyrý rezervteri 10,4 paıyzǵa, ıaǵnı 455,8 mlrd teńgege deıin ósti», - dedi Danııar Aqyshev.
Onyń aıtýynsha, saqtandyrý naryǵyn damytý maqsatynda zań jobasy ázirlengen.
«Ol saqtandyrý qyzmetteriniń qoljetimdiligin arttyrýǵa jaǵdaı jasaýǵa, saqtandyrý qyzmetteriniń sapasyn arttyrý jáne qunyn tómendetýge, saqtandyrý qyzmetterin tutynýshylardyń quqyqtaryn qorǵaýdy kúsheıtýge, saqtandyrý naryǵynyń qarjylyq ornyqtylyǵyn qamtamasyz etýge baǵyttalǵan. Qazirgi ýaqytta zań jobasy Parlamentte qaralaýda», - dedi Ulttyq bank tóraǵasy.
