Saqtandyrý uıymdary jarty jylda qazaqstandyqtarǵa 98 mlrd teńge tólegen

ASTANA. QazAqparat – Saqtandyrý uıymdary jyl basynan beri qazaqstandyqtarǵa 98 mlrd teńge tólegen. Bul týraly Qarjy naryǵyn retteý jáne damytý agenttiginiń saqtandyrý sektorynyń jaǵdaıy týraly sıpattamasynda aıtylǵan, dep habarlaıdy QazAqparat tilshisi.

«2023 jylǵy 1 maýsymdaǵy jaǵdaı boıynsha tólengen saqtandyrý tólemderiniń jalpy kólemi 97 mlrd 940 mln teńge boldy. Bul – ótken jyldyń osyǵan uqsas kezeńimen salystyrǵanda 46,1% artyq. Tólengen saqtandyrý tólemderiniń jalpy somasynda erikti múliktik saqtandyrý – 40,2%, erikti jeke saqtandyrý úlesi – 26,6% jáne mindetti saqtandyrý 33,2%», - dep jazylǵan agenttik málimetinde.

Agenttiktiń málimeti boıynsha elde 26 saqtandyrý uıymy jumys isteıdi. Onyń ishinde 10 uıym ómirdi saqtandyrý baǵytyna mamandanǵan. Al aktıvter saqtandyrý (qaıta saqtandyrý) uıymdarynyń aktıvinde 1 maýsymdaǵy jaǵdaı boıynsha 2 trln 290 602 mln teńge bar Jyldyń basynda bul soma 2 trln 066 mlrd 614 mln teńge bolatyn. Alty aıdaǵy ósim – 10,8%.

«Aktıvterdiń qurylymynda eń úlken úlesti (71,3%) 1 trln 632 mlrd 372 mln teńge somasyndaǵy baǵaly qaǵazdar alady. Odan keıingi orynda ekinshi deńgeıli bankterdegi salymdar (5,1%) - 116 mlrd 769 mln teńge. Qaıta saqtandyrý aktıvteri 85 mlrd 934 mln teńge boldy. Bul saqtandyrylǵan búkil aktıvtiń 3,8%-y degen sóz. Mindettemeler jáne rezervter saqtandyrý uıymdarynyń saqtandyrýshy aldyndaǵy mindettemeleri 1 trln 453 mlrd 158 mln teńge boldy. Mindettemelerdiń qurylymynda eń úlken úlesti (82,1%) 1 trln 193 mlrd 632 mln teńge somasyndaǵy saqtandyrý rezervteri ıelenedi», - delingen sıpattamada.