Saqtandyrý salasyndaǵy alaıaqtyq ózekti máseleniń biri bolyp otyr

Resmı statıstıkalyq málimetter boıynsha 2,7 mıllıon jeńil kólik quraldarynyń 1,5 mıllıonynda ǵana kólik quraldary ıeleriniń azamattyq-quqyqtyq jaýapkershiliginiń mindetti saqtandyrý polısteri bar. Bul týraly búgin Almatyda ótken arnaıy baspasóz máslıhatynda «Munaı saqtandyrý kompanııasy» AQ-nyń Basqarma tóraǵasy Jarqyn Áljanov málim etti.

Onyń aıtýynsha, zańsyz túrde daıyndalǵan nemese jazdyryp alynǵan polıster mundaı mólsherde tek «sur naryqtyń» arqasynda ǵana emes, kóbine osyndaı polısterge degen suranystyń joǵary bolýyna baılanysty taralyp otyr. «Ol polısterdiń shyǵýy klıentten bastap saqtandyrý kompanııasyna deıin, sonymen qatar saqtandyrý naryǵynyń barlyq qatysýshylaryna aýyr tııýi múmkin. Zańsyz berilgen saqtandyrý polısteri naryǵynyń saldarynan klıent saqtandyrý tólemin jáne tıesili qyzmetke qol jetkize almaıdy, nátıjesinde saqtandyrý kompanııalarymen qatar, qarjy ınstıtýttaryna degen senimin joǵaltady. Sondyqtan bunymen qazir kúresýimiz qajet", - dep atap ótti ol.

Onyń sózine qaraǵanda, bul máseleni keshendi túrde, klıentterge barynsha qarapaıym jáne túsinikti jolmen sheshý kerek. "Qazir osy baǵytta Qarjy naryǵyn jáne qarjy uıymdaryn retteý jáne qadaǵalaý agenttigi men Qazaqstannyń Qarjygerler qaýymdastyǵynyń jumys toby sheńberinde bul máseleni sheshýge arnalǵan túbegeıli ózgerister men qosymsha quraldar daıyndalý ústinde", - dedi J. Áljanov.

Qazaqstannyń Qarjygerler qaýymdastyǵynyń Qarjy jáne saqtandyrý sektory departamentiniń dırektory Ánel Ótembaevanyń aıtýynsha, saqtandyrý salasyndaǵy alaıaqtyq tek Qazaqstanda ǵana emes, basqa elderde de ózekti máseleniń biri bolyp tabylady. "Otandyq saqtandyrý kompanııalarynyń bul máseleni belsendi túrde kóterýi bizdi qýantady. Búginde kólik quraldaryn saqtandyrý boıynsha biryńǵaı baza jasaldy. Onda barlyq polıster tirkelgen. Sondyqtan ár saqtandyrýshyǵa senimdi bolýy úshin bazaǵa engendigin teksergeni abzal", - dep eskertti ol.