Saqtandyrý ombýdsmeni ókilettigi keńeıtiledi - Aqyshev

ASTANA. QazAqparat - Saqtandyrý ombýdsmeni ókilettigi keńeıtiledi. Bul týraly búgin Úkimettiń selektorlyq rejımdegi otyrysynda «QR-nyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» Zań jobasyn tanystyrǵan elimizdiń Ulttyq banki tóraǵasy Danııar Aqyshev málim etti, dep habarlaıdy QazAqparat.

«QR-daǵy saqtandyrý ombýdsmeni ınstıtýty 2008 jyldan bastap jumys isteıdi. Qazirgi ýaqytta saqtandyrý ombýdsmeni kólik quraldary ıelerin mindetti saqtandyrý sharttary boıynsha ǵana  taraptar arasyndaǵy daýlardy sotqa deıin retteýdi júzege asyrady. Zań jobasynda taraptardyń sotqa júginý quqyǵyn saqtaı otyryp, saqtandyrýdyń barlyq sanattaryna ombýdsmenniń ókilettigin keńeıtý kózdeledi»,-  dedi Ulttyq bank tóraǵasy.

Onyń aıtýynsha, atalǵan Zań jobasynda saqtandyrý tólemderine kepildik berý qorynyń qosymsha kepildikteri  kózdelgen.

«Kepildik berý júıesinen tólemder annýıtet jáne basqa sharttar boıynsha saqtandyrý tólemderi úzdiksiz júzege asyrylady. Zań jobasynda júıege qatysýshylar jarnalarynyń jáne aktsıonerlerdiń salymdary esebinen qalyptastyrylǵan aktıvterdiń esebin jeke-jeke júrgizý», - dedi ol.

Danııar Aqyshevtyń atap ótýinshe, Zań jobasy 3 kodeks pen 19 zańǵa ózgerister men tolyqtyrýlar engizýdi kózdeıdi.  Bul qujatty qabyldaý memlekettik bıýdjetten qarjylyq shyǵyndardy talap etpeıdi.

QR Premer-Mınıstri Baqytjan Saǵyntaev atalǵan Zań jobasy Úkimet músheleri tarapynan tolyq qoldaýǵa ıe bolǵannan keıin, qujatty bir aıdyń ishinde Májilis qaraýyna engizýdi tapsyrdy.