Saqtandyrý ombýdsmanynyń biliktiligine talaptar artady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń negizgi maqsaty – saqtandyrý naryǵyn jáne baǵaly qaǵazdar naryǵyn odan ári damytý. Ol úshin jańa ónimder engizý, qyzmetterdi tsıfrlandyrý, tutynýshylar men ınvestorlardyń quqyǵyn qorǵaý, zańnamany úzdik halyqaralyq praktıkaǵa sáıkes keltirý talap etiledi. Zań jobasynda úsh kodekske jáne 27 zańǵa ózgerister men tolyqtyrýlar engizý kózdeledi.

«Zań jobasynda Saqtandyrý ombýdsmanynyń klıentterdiń saqtandyrý uıymymen kelispeýshilikterin sotqa deıingi retteýi kózdeledi. Saqtandyrý ombýdsmanynyń biliktiligine talaptar ulǵaıady jáne keńse qyzmetkerlerine talaptar belgilenedi», - dedi QR Qarjy naryǵyn retteý jáne damytý agenttiginiń tóraıymy Mádına Ábilqasymova.

Onyń aıtýynsha, zańnamalyq bastamalardyń blogy Qazaqstannyń qor naryǵyn odan ári damytýǵa baǵyttalǵan. Qor naryǵyn kapıtaldandyrý jyl basynan beri 40 paıyzǵa ulǵaıyp, 47,3 trln teńgeni nemese Іshki jalpy ónimniń 67 paıyzyn qurady. Búgingi kúni ınvestorlardyń quqyqtary men múddelerin qorǵaýdy kúsheıtý bastamalary asa mańyzdy. Qor naryǵynda bólshek ınvestorlardyń eleýli ósýi baıqalyp otyr.

«Qazaqstandyq brokerler úshin klıenttiń ınvestıtsııalyq beıinin mindetti baǵalaý týraly talap engiziledi. Bul beıin onyń bilimine, tájirıbesine jáne qolyndaǵy qarajatyna qaraı aıqyndalady. Nátıjesi boıynsha ınvestorlarǵa beıinine sáıkes qarjy quraldarynyń tizbesi usynylady. Investorlardyń quqyǵyn qorǵaýdaǵy mańyzdy bastama - kompanııalarda korporatıvtik basqarý júıesin jetildirý», - dedi agenttik basshysy.

Zań jobasynyń kelesi baǵyty – qor naryǵynyń ınfraqurylymyn jetildirý.

Sonymen qatar, qor naryǵyn ary qaraı tsıfrlandyrý kózdelgen. Baǵaly qaǵazdardy shyǵarý protsesiniń biryńǵaı tsıfrlyq formatqa tolyq kóshýi qamtamasyz etiledi.

Aıta keteıik, zań jobasynda jınaqtaýshy saqtandyrýdy damytý úshin jańa áleýmettik mańyzdy saqtandyrý ónimderin engizý kózdeledi.

Bul memlekettik bilim berý jınaqtaýshy júıesi aýqymynda jınaqtaýshy saqtandyrý jáne birlesken erli-zaıypty zeınetaqy annýıteti. Bilim berý jınaqtaýshy saqtandyrý ónimi balanyń joǵary oqý ornynda oqýyna aqy tóleý úshin aqshany kepildikpen jınaqtaýǵa múmkindik beredi. Bul ónim qosymsha saqtandyrýdy qamtamasyz etedi

«Ekinshi ónim - birlesken erli-zaıypty zeınetaqy annýıteti. Birlesken annýıtet erli-zaıyptylardyń nemese jaqyn týystarynyń zeınetaqy jınaqtaryn biriktirýge múmkindik beredi. Eger erli-zaıyptylardyń birinde zeınetaqy jınaǵy jetpeı, al ekinshisinde artyq bolsa, olar zeınetaqy jınaqtaryn birge qosyp, zeınetaqy annýıtetin satyp alady. Sonymen birge, tólemderdi ómir boıy alýǵa múmkindik alady», - dep túsindirdi agenttik basshysy.