Saqtandyrý naryǵyndaǵy birqatar kompanııalardyń ınvestorlary ózgeredi - "London-Almaty" SK Basqarma tóraǵasy
; ALMATY. Qyrkúıektiń 14-i. QazAqparat /Erlik Erjanuly/ - Saqtandyrý naryǵyndaǵy kompanııalardyń kópshiliginiń ınvestorlary kásibı emes. Ony "London-Almaty" SK Basqarma tóraǵasy búgin Almatyda ótkizgen baspasóz máslıhatynda aıtty,
dep habarlaıdy QazAqparat.
"Aldaǵy ýaqytta saqtandyrý naryǵyndaǵy birqatar kompanııalardyń ınvestorlary ózgeredi. Óıtkeni ondaǵy ınvestorlar kásibı emes. Erte me, kesh pe olar óz ornyn kásibı ınvestorlarǵa bosatady. Osyǵan oraı naryqta básekelestik artady", deıdi "London-Almaty" saqtandyrý kompanııasynyń Basqarma tóraǵasy Erǵalı Begimbetov. Onyń aıtýynsha, qazir saqtandyrý naryǵyndaǵy kóptegen ınvestorlardyń josparlary qysqa merzimge arnalǵan. Olar saqtandyrý qyzmetin jetik bile bermeıdi. Kásibı ınvestorlardyń kelýimen birge naryqtaǵy básekelestik kúrt óse túsedi. Bul ásirese klassıkalyq saqtandyrý qyzmetterinde jyldam kórinis tabatyn bolady.
