Saqtandyrý naryǵyn aýyr báseke kútip tur - Danııar Aqyshev

ALMATY. QazAqparat - Saqtandyrý naryǵynda  DSU-nyń sheteldik kompanııalardyń fılıaldaryn engizý týraly talaby júzege asatyn boldy. Bul týraly búgin Almatyda ótip jatqan qarjygerlerdiń VIII Kongresinde QR Ulttyq bankiniń basshysy Danııar Aqyshev aıtty, dep habarlaıdy QazAqparat tilshisi.

«Osy oraıda ulttyq saqtandyrý naryǵynda turaqty damý modelin jasaqtaýǵa ýaqyt az qaldy. Olarǵa sheteldik kompanııalarmen básekelesýge týra keledi», - dedi ol.

Danııar Aqyshev 5 jylda eki ese artqanyna qaramastan qazaqstandyq saqtandyrý naryǵy áli de táýekelderdi sińiretin joǵary kapıtaldy quralǵa aınala almaı jatqanyn aıtty. 

«Saqtandyrý naryǵynyń el ekonomıkasyndaǵy mańyzy áli de mardymsyz. Sońǵy 10 jylda saqtandyrý syıaqylary JІÓ 1 paıyzynan asqan joq. Bizdiń kórsetkishimiz tek damyǵan elder ǵana emes, TMD kóleminde de tómen bolyp tur», - dedi bas bankır.

Onyń aıtýynsha, 2018 jyly Ulttyq bank saqtandyrý naryǵy týraly zańnamany jetildirdi. Sonyń arqasynda onlaın-saqtandyrý, tutynýshylardyń quqyǵyn qorǵaý,  shetelge shyǵatyn týrısterdiń quqyǵyn qorǵaý kestesi ózgertildi.

Endigi kezekte jańa talaptarǵa sáıkes saqtandyrý uıymdarynyń aktsıonerleri men menedjmentine naryqta ádil áreket etý úshin kúsh biriktirýge týra keledi.