Saqtandyrý qory 2021 jylǵa medıtsınalyq qyzmetterdi satyp alýdy jarııalady
ALMATY. QazAqparat – Áleýmettik medıtsınalyq saqtandyrý qory tegin medıtsınalyq kómektiń kepildendirilgen kólemi jáne mindetti áleýmettik medıtsınalyq saqtandyrý paketteri boıynsha medıtsınalyq qyzmetterdiń negizgi kólemine 2021 jylǵa shamamen 1,5 trln teńge satyp alýdy jarııalady, bul soma ortasha eseppen 20% artady, dep habarlaıdy QazAqparat tilishsi.
Kelesi jyly halyqtyń qajettiliginiń artýyn jáne eldegi epıdemııalyq jaǵdaıdy eskere otyryp, medıtsınalyq kómekti satyp alý kóleminiń ulǵaıýy boljanýda.
Saqtandyrylǵan halyq úshin mamandandyrylǵan medıtsınalyq kómektiń, onyń ishinde aýyldyq jerlerde qymbat joǵary tehnologııalyq qyzmetterdiń kólemi artady.
«Qor elimizdiń medıtsınalyq uıymdarynan 2021 jylǵa josparlanǵan medıtsınalyq qyzmetterdiń negizgi kólemine ótinimder qabyldaýdyń bastalǵany týraly habarlaıdy. Osy jyldyń jeltoqsan aıynda satyp alýdy ótkizý 2021 jyldyń 1 qańtarynan bastap halyqty medıtsınalyq kómekpen qamtamasyz etýge múmkindik beredi», - dep atap ótti Áleýmettik medıtsınalyq saqtandyrý qorynan.
Aıta keteıik, 2020 jyldyń basynda áleýmettik medıtsınalyq saqtandyrýdyń engizilýimen densaýlyq saqtaý júıesiniń bıýdjeti 1,6 trln teńgeni qurap, medıtsınalyq kómek kólemi 1,5 esege artty.
Bıyl alǵash ret MÁMS qarajaty esebinen mektep medıtsınasyn qarjylandyrý kózdeldi, konsýltatsııalyq-dıagnostıkalyq kómekti qarjylandyrý kólemi aıtarlyqtaı keńeıtildi - 6 ese, 183,8 mlrd teńge. Sonymen qatar, MÁMS engizilýimen qalpyna keltirý emi men medıtsınalyq ońaltýdy qarjylandyrý kólemi – 8 ese, 55,7 mlrd teńgege deıin ósti.Statsıonardy almastyratyn kómekti qarjylandyrý eki ese – 50,3 mlrd teńgege ulǵaıdy.
Esterińizge sala keteıik, 2020 jylǵa medıtsınalyq saqtandyrý qorynyń satyp alýlaryna 1 296 medıtsınalyq qyzmet berýshi qatysty, onyń ishinde - 691 memlekettik medıtsınalyq uıymdar (53%), 605 – jeke menshik (47%).
Qor biryńǵaı strategııalyq satyp alýshy retinde qyzmetterdi satyp alýdyń elektrondyq formatyna kóshti.
Bul satyp alýdyń elektrondyq formaty rásimniń ashyqtyǵyn qamtamasyz etýge múmkindik beredi, sonymen qatar, medıtsınalyq uıymdardyń satyp alý rásimderin jeńildetedi.
«Qazirgi ýaqytta veb-portalda habarlandyrý jarııalandy, oǵan jaýap retinde áleýetti ónim berýshilerdiń derekqoryna engizilgen ónim berýshiler konkýrsqa qatysýǵa ótinim beredi. Budan ári quramyna Qordyń, ýákiletti organnyń (respýblıkalyq komıssııa quramynda), densaýlyq saqtaý basqarmasynyń (óńirlik komıssııalar quramyna), «Atameken» UKP, medıtsınalyq qyzmetterdi tutynýshylardyń múddelerin bildiretin úkimettik emes uıymdardyń, densaýlyq saqtaý sýbektileriniń nemese medıtsınalyq qyzmetkerlerdiń jáne medıtsınalyq qyzmetter sapasyna syrtqy saraptama fýnktsııalaryn júzege asyratyn ýákiletti organnyń aýmaqtyq bólimsheleriniń ókilderi kiretin komıssııa ótinimderdi qaraıdy. Budan keıin Veb-portalda qorytyndylardyń hattamasy avtomatty túrde qalyptastyrylady, ol ónim berýshi men Qor arasynda sharttar jasasý úshin densaýlyq saqtaý aqparattyq júıelerine jiberiledi»,– delingen habarlamada.
Ótinimderdi qabyldaý 2020 jylǵy 7 jeltoqsan saǵat 9:00-den 14 jeltoqsan saǵat 18:30-ǵa deıin júzege asyrylady.
Sondaı-aq Qordyń (Qazaqstandaǵy MÁMS) resmı YouTube arnasynda medıtsınalyq qyzmetterdi satyp alý veb-portalynda jetkizýshilerdiń elektrondyq formatta ótinim berýi boıynsha oqytý jazbasy ornalastyrylǵan.
