Saqtandyrý kompanııalarymen daýlarda kásipkerlerdi qorǵaýǵa mán berý kerek - Májilis

NUR-SULTAN. QazAqparat – Búgin Parlament Májilisiniń jalpy otyrysynda depýtat Erik Ómirǵalı eldegi tártipsizdik kezinde zardap shekken kásipkerler máselesin kóterdi. Osy oraıda ol Úkimet basshysy Álıhan Smaıylovtyń atyna saýal joldady, dep habarlaıdy QazAqparat tilshisi.

Onyń aıtýynsha, qazirgi kezde saýda ortalyqtary men basqa da jyljymaıtyn múlik ıeleri ózderiniń kásipkerlik qyzmetin qalpyna keltirýge tyrysyp jatyr, alaıda ǵımarattardyń ınfraqurylymyna da zaqym kelgen. Bul óz kezeginde jóndeý jumystaryn qıyndatyp otyr.

Osy oraıda ol keltirilgen shyǵyn qomaqty somaǵa jetip otyrǵanyn eske saldy.

«Kóbisi úshin bul shyǵyn bankrottyqqa jáne ómir boıy alǵan qaryzdy óteýge alyp kelýi múmkin. Qazirgi kezde olarǵa qandaı da bir saraptama men is-qımyl algorıtmi kerek ekenin túsindirip jatyr. Alaıda eshqaısynda ary qaraı isti júrgizý men bıznesti saqtaý boıynsha naqty túsinik joq», - dedi Erik Ómirǵalı.

Osy oraıda depýtat júzege asyrylýy kerek tıisti usynystardy jarııalady. Birinshiden, Qarjylyq monıtorıng agenttigi barlyq bank pen mıkronesıelik uıymdarǵa zańdy ári jeke tulǵalar úshin qaryzdary boıynsha 90 kúnge keıinge tóleýdi engizýdi mindetteý kerek. Bul óz kezeginde jóndeý jumystaryn júrgizýge jáne tabysty qalpyna keltirýge múmkindik beredi. Dál osy merzimge atalǵan sebepter boıynsha salyqty keıinge shegerý usynysy da aıtyldy.

«Bas prokýratýra men Qarjy naryǵyn retteý jáne damytý agenttigi saqtandyrý kompanııalarymen daýlarda kásipkerlerdi qorǵaýǵa mán bergeni jón. Sebebi saqtandyrý kompanııalary kásipkerler tarapynan turaqty tólemder jasalǵanyna qaramastan, saqtandyrý ótemaqylaryn tóleýden bas tartyp otyr», - dedi depýtat.