Saqtandyrý kompanııalary kıikten zardap shekken sharýalarmen jumys isteýge qulyqsyz

ASTANA. QazAqparat – Aýyl sharýashylyǵy vıtse-mınıstri Ábilhaıyr Tamabek Májilis depýtattarynyń saýalyna joldaǵan jaýabynda kıikten zardap shekken sharýalarǵa arnalǵan saqtandyrý ónimi nege ázirlenip bitpeı jatqanyn túsindirdi, dep habarlaıdy QazAqparat tilshisi.

Vıtse-mınıstrdiń aıtýyna qaraǵanda, egis alqaptaryna, jaıylymdar men shabyndyqtarǵa kıikten kelgen zalaldy saqtandyrý baǵytynda arnaıy ónim joq.

«Búgingi tańda, mınıstrlik «Agrarlyq nesıe korporatsııasy» AQ-men jumys júrgizip otyr. Akıtsonerlik qoǵam óz kezeginde máseleni «Agrosaqtandyrý Qaýymdastyǵy» zańdy tulǵalar birlestigimen pysyqtap jatyr. Atalǵan qaýymdastyqtyń aqparaty boıynsha, saqtandyrý kompanııalarynyń kıikterdiń egistikti, shabyndyqtar men jaıylymdardy zaqymdaýynan táýekelderdi saqtandyrý baǵytynda ónim ázirleýi múmkin bolmaı otyr. Bul adam faktorynyń áser etý qaýpiniń joǵary bolýy, sybaılas jemqorlyq táýekelderi, osy protsesti ákimshilendirýdiń kúrdeliligi, álemdik tájirıbede jáne qoldanystaǵy zańnamalarda osy baǵyttaǵy zalaldardy saqtandyrý óniminiń bolmaýy, sapaly statıstıka jáne qajetti ınfraqurylym (meteostantsııa) qajettigine baılanysty», - dep jazylǵan jaýapta.