Saqtandyrý polısin alarda agentke qansha tóleıtinińizdi bile alasyz
ASTANA. KAZINFORM — Qazaqstan azamattary saqtandyrý agentiniń komıssııalyq syıaqysyn tóleýge olardyń saqtandyrý qunynan qansha shyǵatynyn bile alady.
Bul tutynýshylarǵa saqtandyrý sharttaryn barynsha jaqsy túsinýge jáne saqtandyrý ónimderin tańdaý kezinde sanaly sheshimder qabyldaýǵa múmkindik beredi. Tıisti ózgerister Qarjy naryǵyn retteý jáne damytý agenttigi basqarmasynyń 2026 jylǵy 30 qazandaǵy № 156 qaýlysynda kózdelgen.
Agenttik tóraǵasynyń orynbasary Nurjan Tursynhanov jańa erejege túsinikteme bere otyryp, erikti saqtandyrýdy satyp alý kezinde klıent saqtandyrý agentiniń óz qyzmetteri úshin qansha somany alatynyn árdaıym bile bermeıtinin atap ótti. Bul rette saqtandyrý ónimin satqany úshin saqtandyrý kompanııasy agentke syıaqy tóleıdi.
— Jańa qaǵıdalar boıynsha saqtandyrý kompanııalary men saqtandyrý agentteri klıentterge osyndaı syıaqynyń mólsheri týraly aldyn ala habarlaýǵa mindetti bolady. Bul aqparat klıentke konsýltatsııa berý jáne saqtandyrý qujatyn resimdeý kezinde usynylýy tıis. Sonymen qatar, agenttiń syıaqy mólsheri tikeleı saqtandyrý shartynda jáne saqtandyrý polısinde (eger ony resimdeý kózdelgen bolsa) kórsetilýi kerek. Bul rette soma teńgemen de, saqtandyrý qunynyń paıyzymen de kórsetilýge tıis. Buǵan deıin saqtandyrý polısinde agentke naqty somany ashpaı-aq syıaqy kózdelgeni ǵana kórsetilgen, — dep atap ótti N.Tursynhanov.
Jańa talaptar erikti saqtandyrý túrlerine qoldanylady, sebebi mindetti saqtandyrý ónimderin satý kezinde saqtandyrý agentteriniń qatysýyna jol berilmeıdi.
— Bul jańa ereje tutynýshylarǵa saqtandyrý sharttaryn barynsha jaqsy baǵalaýǵa, saqtandyrý kompanııalarynyń usynystaryn salystyrýǵa jáne eń qolaıly ónimdi tańdaýǵa múmkindik beredi. Sonymen qatar, syıaqy mólsherin ashyp kórsetý agent klıentke klıenttiń qajettilikterine emes, óziniń qarjylyq múddelerine negizdelgen belgili bir saqtandyrýdy usynatyn jaǵdaılardyń táýekelin azaıtýǵa kómektesedi. Osylaısha, jańa qaǵıdalar saqtandyrý naryǵyn barynsha ashyq etedi, tutynýshylardyń múddelerin qorǵaýdy arttyrady jáne azamattardyń saqtandyrý kompanııalaryna degen senimin nyǵaıtýǵa yqpal etedi, — dep tolyqtyrdy agenttik tóraǵasynyń orynbasary.
Qaýly alǵashqy resmı jarııalanǵan kúninen keıin kúntizbelik 10 kún ótken soń kúshine enedi.
Buǵan deıin 2027 jyldan bastap azamattar saqtandyrýsyz qandaı medıtsınalyq qyzmetterdi ala alatynyn jazǵanbyz.
