Saqtandyrý men baǵaly qaǵazdar naryǵyn retteıtin jańa zańdar ázirlenedi — Ulttyq bank
ASTANA. KAZINFORM — Saqtandyrý men baǵaly qaǵazdar naryǵyn retteıtin jańa zańdar ázirlenedi. Bul týraly Ulttyq bankten málim etti.
— Memleket basshysynyń tapsyrmalaryn oryndaý aıasynda ýákiletti organ Qarjy naryǵyn retteý jáne damytý agenttigimen birlesip, bıyl 1 qyrkúıekke deıin saqtandyrýdyń jáne qor naryǵyn damytýdyń 2030 jylǵa deıingi baǵdarlamalaryn ázirleýdi josparlap otyr. Bul baǵdarlamalar saqtandyrý sektory men baǵaly qaǵazdar naryǵynyń el ekonomıkasyna qosatyn úlesin eseleýge baǵyttalady. Qazir osy qujattardyń negizgi kontseptýaldyq baǵyttary pysyqtalyp jatyr, — dedi ortalyq bank agenttiktiń resmı saýalyna oraı.
Ulttyq bank aldaǵy ýaqytta halyqaralyq ozyq tájirıbe men qazirgi syn-qaterlerdi eskere otyryp saqtandyrý men baǵaly qaǵazdar naryǵyn retteıtin jańa zańdar ázirlenetinin atap ótedi.
— Bul — baǵdarlamalardy tıimdi iske asyrýdyń alǵysharty. Osy bastamanyń barlyǵyn qarjy naryǵyna qatysýshylarmen jáne halyqaralyq sarapshylarmen birlesip iske asyramyz, — dedi qarjy retteýshisi.
Osy jyldyń aqpanynda ótken Úkimet otyrysynda Memleket basshysy Qasym-Jomart Toqaev Qarjy naryǵyn retteý jáne damytý agenttigi men Ulttyq bankke 1 qyrkúıekke deıin saqtandyrý jáne qor naryǵyn damytýdyń 2030 jylǵa deıingi baǵdarlamasyn ázirleýdi tapsyrǵan edi.
