Saqtandyrylmaǵanyna qaramaıdy: Qazaqstanda tegin medıtsınalyq kómektiń biryńǵaı paketi engiziledi
ASTANA. KAZINFORM — Qazaqstanda medıtsınalyq kómektiń qoljetimdiligi men tıimdiligin arttyrý maqsatynda biryńǵaı bazalyq paket engiziledi. Bul týraly Densaýlyq saqtaý mınıstrligi habarlady.
Memleket basshysynyń tapsyrmasyna sáıkes qabyldanǵan jańa zań MÁMS júıesin jańǵyrtyp, azamattardyń densaýlyǵyn qorǵaýǵa baǵyttalǵan kepildikterdi kúsheıtedi. 2026 jyldan bastap medıtsınalyq kómektiń biryńǵaı paketi kezeń-kezeńimen engiziledi.
Onkoskrınıng barlyǵyna qoljetimdi bolady
Jańa modelge sáıkes, saqtandyrý mártebesine qaramastan barlyq azamattar úshin áleýmettik máni bar aýrýlardy erte anyqtaýǵa arnalǵan qyzmetter qoljetimdi bolady. Atap aıtqanda, onkologııalyq aýrýlarǵa arnalǵan skrınıngter TMKKK paketine engiziledi.
Buǵan deıin onkoskrınıng tek MÁMS júıesinde kórsetilse, endi ol bazalyq paket arqyly búkil halyq úshin ashyq bolady. Sonymen qatar týberkýlez jáne AITV ınfektsııasy boıynsha dıagnostıka burynǵysha tegin júrgiziledi.
Qandaı qyzmetter saqtalady?
Saqtandyrylmaǵan azamattar úshin de birqatar mańyzdy qyzmetter qoljetimdi bolyp qala beredi. Atap aıtqanda:
-
alǵashqy medıtsınalyq-sanıtarlyq kómek;
-
vaktsınatsııa jáne onkoskrınıng;
-
áleýmettik máni bar aýrýlarǵa kúdik týyndaǵan jaǵdaıda dıagnostıka;
-
jedel jáne shuǵyl medıtsınalyq kómek;
-
ınfektsııalyq aýrýlar kezindegi em;
-
pallıatıvtik kómek pen uzaq merzimdi kútim;
-
qan preparattarymen qamtamasyz etý;
-
áleýmettik mańyzdy aýrýlarǵa arnalǵan tegin dárilik qamtamasyz etý.
Mınıstrliktiń habarlaýynsha, bul ózgerister bıýdjet múmkindikteri men halyqtyń qajettilikteri arasynda teńgerimdi qamtamasyz etip, júıeniń qarjylyq turaqtylyǵyn arttyrýǵa baǵyttalǵan.
Halyqaralyq tájirıbe qandaı?
Salystyrmaly túrde alǵanda, Reseıde tegin kómek sanıtarııalyq avıatsııa, AITV/JITS, jynystyq jolmen beriletin ınfektsııalar, týberkýlez jáne psıhıkalyq aýrýlarmen shekteledi.
Estonııa men Lıtvada tek shuǵyl kómek kórsetilse, Germanııa men Nıderlandyda meıirgerlik kútim ǵana usynylady.
Aıta keteıik, D jáne E sanatyndaǵy adamdar MÁMS sheńberinde medıtsınalyq kómek ala alady.