Sáken Jasuzaqov TMD qorǵanys mınıstrleri keńesiniń otyrysyna qatysty

ASTANA. QazAqparat - Búgin Máskeýde TMD-ǵa múshe memleketter qorǵanys mınıstrleri keńesiniń kezekti 71-shi otyrysy ótti. Otyrysqa qatysý úshin QR Qorǵanys mınıstri general-polkovnık Sáken Jasuzaqovtyń basshylyq etýimen qazaqstandyq áskerı delegatsııa bardy, dep habarlaıdy atalǵan vedomstvonyń baspasóz qyzmeti.

Otyrysta taraptar TMD ÁShQQ Birikken júıesin damytý jáne ustaýǵa, TMD qatysýshy memleketter Qarýly Kúshteri ınjenerlik áskerleriniń ózara is-qımyly, baılanys júıeleri, izgilik mınasyzdandyrý aıasynda yntymaqtastyqty keńeıtý, áskerı kadrlardy oqytý, TMD pishiminde birlesken áskerı-sporttyq jáne bilim berý is-sharalaryn ótkizýge qatysty máselelerdi talqylady.

Qorǵanys vedomstvolarynyń basshylary áýe-ǵaryshtyq qorǵanys tapsyrmalaryn sheshýge TMD ÁShQQ Birikken júıesiniń beıimdelýiniń negizgi baǵyttaryn, sondaı-aq, TMD memleketteri joǵary áskerı oqý oryndarynyń assotsıatsııasyn qurýdy maquldady. Assotsıatsııany qurý áskerı bilim berý aıasynda yntymaqtastyqty keńeıtý arqyly TMD-nyń jalpy bilim berý keńistigin saqtaý men damytýǵa baǵyttalǵan TMD QMK qyzmetindegi jáne onyń jumys organdarynyń kezekti josparly qadamy bolyp tabylatynyn aıta ketken jón.

 

Odan basqa, taraptar 2016 jylǵy Armııa halyqaralyq oıyndarynyń qorytyndysyn jasap, áskerlerdiń dalalyq mashyǵy aıasynda Dostastyqtyń qatysýshy memleketteri Qarýly Kúshteriniń yntymaqtastyǵyn ári qaraı damytý máselelerin talqyǵa saldy.

Otyrys qorytyndysy boıynsha áskerı vedomstvolardyń basshylary kelesi jyldyń birlesken jumysyn, onyń ishinde, TMD QMK qurylǵandyǵynyń 25 jyldyǵyna arnalǵan is-sharalardy josparlady.