Sáken Seıfýllınniń beınekadry tabyldy
ALMATY. 7 mamyr. QazAqparat - Osy ýaqytqa deıin zertteýshiler qol jetkize almaı júrgen Sáken Seıfýllınniń tuńǵysh beınekadry Máskeý muraǵattarynan tabyldy.
Ony rejısser Jánibek Jetirýov Turmaǵambet Іztileýov týraly derekti fılmge jınaǵan materıaldary arasynan kezdeısoq taýyp alǵan kórinedi.
"Bıyl týǵanyna 130 jyl tolǵaly otyrǵan halyq aqyny, áıgili aýdarmashy Turmaǵambet Іztileýov týraly ótken jyly derekti fılm túsirgen edim. Oǵan Máskeý muraǵattarynan jınaǵan materıaldar arasynan Sáken Seıfýllınniń áldebir jınalystaǵy beınekadryn taýyp aldym. Onda Sákenniń eki joldasymen jınalys kezinde qol shapalaqtap, ózara sóılesip turǵan sátteri beınelengen. Ázirge Sáken Seıfýllınniń janyndaǵy adamdardyń kim ekeni anyqtalǵan joq", - deıdi Jánibek Jetirý. Rejısser bul kadrlardy fılologııa ǵylymynyń doktory, ál-Farabı atyndaǵy Qazaq ulttyq ýnıversıtetiniń professory Tursynbek Kákishevke arnaıy kórsetken kórinedi. Sákentanýshy ǵalym onda Sáken Seıfýllındi birden tanyǵan. Ǵalymnyń aıtýynsha, buǵan deıin aqynnyń artynda qalǵan murasynyń arasynda fotolary bolmasa, birde-bir beınekadry tabylmaǵan. Sondyqtan bul jańalyqty qazaq qoǵamy úshin úlken oqıǵa deýge bolady.
Sáken (Sádýaqas) Seıfýllın - Qazaq keńes ádebıetiniń negizin salýshylardyń biri, aqyn, qoǵam jáne memleket qaıratkeri. Ol 1884 jyly 15 qazanda Jezqazǵan óńirindegi burynǵy Aqadyr aýdanyndaǵy Qarashilik qystaǵynda dúnıege kelgen. Sáken qazaq jazýshylary ishinen tuńǵysh ret Eńbek Qyzyl Tý ordenimen marapattalyp, 1938 jyly jazyqsyz qýǵyn-súrginge ushyrap, Almatyda atylyp, 1958 jyly aqtalǵan. S. Seıfýllın týraly S.Muqanovtyń "Sáken Seıfýllın" pesasy, Ǵ.Músirepovtyń "Kezdespeı ketken bir beıne" povesi, Á.Tájibaev, A.Toqmaǵambetov, Q.Bekhojın jáne taǵy basqa aqyndardyń poemalary, E.Ysmaıylov, S.Qırabaev, T.Kákishev sııaqty ǵalymdardyń ádebı zertteýleri men estelikteri jaryq kórgen.
