Sáken Maıǵazıev koronavırýsqa qarsy vaktsına saldyrdy
NUR-SULTAN. QazAqparat – Tanymal ánshi, «Shymkent qalalyq mádenıet úıi» kontserttik uıymy» MKQK dırektorynyń mindetin atqarýshysy Sáken Maıǵazıev koronavırýsqa qarsy vaktsına saldyrdy, dep habarlaıdy QazAqparat.
Ánshi Shymkenttegi Medıker ortalyǵynda «Spýtnık V» ekpesin saldyrǵan.
«Eshkim májbúrlegen joq, men de eshkimdi úgittemeımin. Byltyrǵydaı ólim-jitim kóbeımese eken, eń bolmasa taralýyna sebepshi bolmasam eken degen nıet. Oqshaýlanyp, qashyqtan jumys istep sharshadyq. Keshe jarııalaıyn dedim de, búgin qandaı áserde bolǵanymmen bólispekke bel býdym. Bir Allaǵa sheksiz shúkir, jaǵdaıym jaqsy. Tańǵy tórtte tursam terlep jatyr ekem. Eshqandaı aýyrtpalyq sezbedim», - dep jazdy S. Maıǵazıev óziniń Instagram paraqshasynda.
Aıta keteıik, Qazaqstanda vaktsına saldyrǵan adamdar sany jarty mıllıonnan asty. 2021 jylǵy 15 sáýir kúngi derekter boıynsha Qazaqstanda 505 451 adam vaktsına saldyrdy.
Qazaqstan musylmandarynyń dinı basqarmasy vaktsına salýdyń orazany buzbaıtynyn túsindirdi.
