Sáken Bıbosynov spartakıadanyń úzdik boksshysy atandy

Tokıo Olımpıadasynyń qola júldegeri, álem chempıony Sáken Bıbosynov Qazaqstan spartakıadasynyń úzdik boksshysy atandy, dep habarlaıdy Kazinform.

Túrkistan oblysynyń ókili olımpıadalyq salmaq bolyp esepteletin 51 kelisalmaq dárejesinde óziniń úzdik ekenin dáleldedi. 

Sáken jartylaı fınalda batysqazaqstandyq Danıal Sábıtten basym tústi. Al sheshýshi básekede taǵy bir álem chempıony, astanalyq Sanjar Táshkenbaıdy jeńdi. Tóreshiler bul kezdesýde 5:0 esebimen Bıbosynov jeńiske jetti dep eseptedi. Osylaısha ol ekinshi ret qatarynan Qazaqstan spartakıadasynda jeńis tuǵyryna kóterildi. 

Taǵy bir salmaqta álem chempıondary sharshy alańǵa shyqty. Astanalyq Nurbek Oralbaı 80 kelige deıingi salmaqta mańǵystaýlyq Bekzat Nurdáýletovti qapy qaldyrdy. 

Tórt jylda bir ret uıymdastyrylatyn aıtýly básekede 13 salmaqta 176 sportshy baq synady.

Jarys qorytyndysynda Sáken Bıbosynov týrnırdiń úzdik boksshysy atandy. 86 kelige deıingi salmaqta qarsylas shydatpaǵan astanalyq Temirlan Muqataev týrnırdegi jańa esimderdiń biri dep tanyldy. Tilek Manap spartakıadanyń eń úzdik tóreshisi retinde marapattaldy. 

Jalpy esepte 3 altyn, 2 kúmispen Astana qalasy boksshylary top jardy. Jambyl (3 altyn), Túrkistan (2 altyn, 2 kúmis, 1 qola) oblystary úzdik úshtikke ilikti. Aqmola oblysy (2 altyn, 1 kúmis, 1 qola) tórtinshi orynǵa taban tiredi.