Sáken Bıbosynov eki dúrkin álem chempıony atandy

ASTANA. KAZINFORM — Birikken Arab Ámirliginiń Dýbaı qalasynda ótip jatqan álem chempıonatynda fınalda el quramasynan Sáken Bıbosynov (54 keli) sharshy alańǵa shyqty. 

Otandasymyz fınalda reseılik Vıacheslav Rogozınmen qolǵap túıistirdi. Birinshi raýndta tóreshilerdiń ekeýi Sákenniń jeńisine qoldaý bildirse, qalǵany reseılik boksshynyń basymdyǵyn moıyndady. Ekinshi raýndta ol qarsylasynan 5:0 esebimen basym tústi. Sheshýshi raýndta da Sáken jınaqy qımyldady. Osylaısha ol eki dúrkin álem chempıony atandy.

Qazirge deıin otandasymyz Fakı Issa Fakı (Tanzanııa), Katego Keorapetse (Botsvana), zambııalyq Mýengo Mýale syndy qarsylastaryn qapy qaldyrdy.

Sáken Bıbosynov — ulttyq qurama sapyndaǵy tájirıbeli boksshynyń biri. 1992 jyly dúnıege kelgen bylǵary qolǵap sheberi 2020 jyly Tokıo Olımpıadasynda qola alsa, álem chempıonatynda 2021 jyly — altyn, 2019 jyly — qola medalǵa qol jetkizdi. Sondaı-aq Azııa chempıonatynda kúmis (2022) jáne qola (2021) júldeger atandy. 

Endi el quramasynan Orazbek Asylqulov (57 keli) tájikstandyq Hýsravhon Rahımov, Abylaıhan Júsipov (71 keli) reseılik Sergeı Koldenkov, Sabyrjan Aqqalyqov (75 keli) reseılik Ismaıl Mýtsolgovpen qolǵap túıistiredi.

Atalǵan dodada baq synaǵan otandastarymyz Temirtas Júsipov (48 keli), Ertýǵan Zeınýllınov (63,5 keli) qola júldeni qanaǵat tutty. Sondaı-aq qazaqstandyq Danııal Sábıt (51 keli), Serik Temirjanov (60 keli), Sanatáli Tóltaev (67 keli), Erasyl Jaqpekov (80 keli), Dáýlet Tólemisov (86 keli), Nýrmagamed ıÝsýpov (92 keli) jáne Nurlan Saparbaı (92 keliden joǵary) jarysty erte aıaqtady.

Aıta ketsek, álemdik dodada Reseı quramasynan 12 boksshy altynǵa talasýǵa múmkindik alǵan edi. Al Ózbekstan sapynan 6 boksshy fınalǵa shyqsa, Qazaqstannan - 4, Ázerbaıjan, Belarýs, Qyrǵyzstan jáne Tájikstannan 1 boksshy jeńistiń eń bıik tuǵyryna kóterilýge múmkindik aldy. 

Buǵan deıin Dýbaıdaǵy álem chempıonatynyń fınalynda baq synaıtyn qazaqstandyq boksshylar sharshy alańǵa qashan shyǵatynyn jazǵan edik.