Sáken Bıbosynov bokstan álem chempıonatyn sátti bastady

ASTANA. KAZINFORM — Halyqaralyq boks assotsıatsııasy (IBA) aıasynda ótip jatqan álem chempıonatynda búgin, 6 jeltoqsanda el quramasynan Sáken Bıbosynov (54 keli) qarsylasynan basym tústi.

Otandasymyz alǵashqy jekpe-jeginde botsvanalyq Katego Keorapetsemen sheberlik baıqasty.

Jekpe-jek barysynda qazaqstandyq boksshy shıraq qımyldady. Nátıjesinde qarsylasyn ekinshi raýndta qapy qaldyryp, jarysty jalǵastyrýǵa múmkindik aldy. 

Sálden keıin Danııal Sábıt (51 keli) kenııalyq Kelvın Maınamen sharshy alańǵa shyǵady.

Sáken Bıbosynov — ulttyq qurama sapyndaǵy tájirıbeli boksshynyń biri. 1992 jyly dúnıege kelgen bylǵary qolǵap sheberi 2020 jyly Tokıo Olımpıadasynda qola alsa, álem chempıonatynda 2021 jyly — altyn, 2019 jyly — qola medalǵa qol jetkizdi.

Sondaı-aq Azııa chempıonatynda kúmis (2022) jáne qola (2021) júldeger atandy. 

Endi el quramasynan sońǵy jekpe-jekti Serik Temirjanov (60 keli) mońǵolııalyq Erdenebatyn Tsendbaatarǵa qarsy ótkizedi.

Aıta ketsek, qazirge deıin otandastarymyz arasynan Sanatáli Tóltaev (67 keli), Erasyl Jaqpekov (80 keli), Dáýlet Tólemisov (86 keli), Nýrmagamed ıÝsýpov (92 keli) jarysty jalǵastyrýǵa múmkindik aldy. 

IBA týrnıri 3-13 jeltoqsan aralyǵynda Dýbaıda uıymdastyrylady. Bul básekede 13 salmaq dárejesi belgilengen, al júlde qory óte joǵary: chempıondar — 300 myń dollar, kúmis júldegerler — 150 myń dollar, qola júldegerler — 75 myń dollar, al shırek fınalıster 10 myń dollar alady.