Sáken Bıbosynov álem chempıonatynda altyn medalǵa talasady

ASTANA. KAZINFORM - Halyqaralyq boks assotsıatsııasy (IBA) aıasynda Dýbaıda (BAÁ) ótip jatqan álem chempıonatynda el quramasynan Sáken Bıbosynov (54 keli) fınalǵa shyqty.

Otandasymyz jartylaı fınalda nepaldyq Tpapa Chandra Bahadýrmen qolǵap túıistirdi.

Alǵashqy eki raýndta qazaqstandyq boksshynyń basymdyǵy aıqyn ańǵaryldy. Bul qarqynyn sheshýshi raýndta da jalǵastyra aldy. Nátıjesinde tóreshilerdiń biraýyzdan sheshimimen jeńiske jetip, fınalǵa joldama aldy. Ol endi altyn júldeni reseılik Vıacheslav Rogozınmen sarapqa salady.

Aıta ketsek, budan buryn otandasymyz Fakı Issa Fakı (Tanzanııa), Katego Keorapetse (Botsvana), Mýengo Mýale (Zambııa) syndy qarsylastaryn qapy qaldyrdy.

Sáken Bıbosynov — ulttyq qurama sapyndaǵy tájirıbeli boksshynyń biri. 1992 jyly dúnıege kelgen bylǵary qolǵap sheberi 2020 jyly Tokıo Olımpıadasynda qola alsa, álem chempıonatynda 2021 jyly — altyn, 2019 jyly — qola medalǵa qol jetkizdi.

Sondaı-aq Azııa chempıonatynda kúmis (2022) jáne qola (2021) júldeger atandy. 

Endi qazaqstandyq boksshylar arasynan Orazbek Asylqulov (57 keli), Ertýǵan Zeınýllınov (63,5 keli), Abylaıhan Júsipov (71 keli) sharshy alańǵa shyǵady.

Aıta ketsek, búgin Sabyrjan Aqqalyqov (75 keli) jartylaı fınaldaǵy qarsylasy ózbekstandyq Fazlıddın Erkınboevtyń jarysty jalǵastyrýdan bas tartýyna baılanysty birden fınalǵa shyqty.

Al Temirtas Júsipov (48 keli) jartylaı fınalda reseılik Edmond Hýdoıanǵa ese jiberip, qola júldeni qanaǵat tutty.