Saqaldy fýtbolshylarǵa aıyppul salynady
ASTANA. QazAqparat - Túriktiń «Genchlerbırlıgı» klýbynyń prezıdenti Ilhan Djavdjav saqal qoıǵan fýtbolshylardy jazalaýǵa usynys shyǵardy, dep habarlady The Guardian.
«Jasym 80-de. Alaıda kúnde qyrynamyn. Bul ımamdardyń mektebi emes. Sportshylar jastarǵa úlgi bolýy tıis», - dedi Djavdjav.
«Genchlerbırlıgı» basshysy saqal qoıǵan óz komandasynyń oıynshylaryna 25 myń túrik lıri (11 myń dollarǵa jýyq) kóleminde aıyppul salýdy josparlap otyrǵandyǵyn aıtty. Sonymen qatar ol bul tyıymdy barlyq túrik chempıonatynyń oıynshylaryna qoldanýǵa nıetti.
Túrik birinshiliginde kóbinese ıslam dinin ustanatyn fýtbolshylar oıynǵa shyǵatynyn atap ótemiz. Islamshyl fýtbolshylar bul sheshimge narazy, olar saqal qoıýdy paryz sanaıdy.
