«Saqaldy» qurylys: Osınov asýyndaǵy aınalma jol salynyp bitýge taıaý

SEMEI. KAZINFORM – Shyǵys Qazaqstandaǵy eń kórikti týrıstik jerler – Buqtyrma men Katonqaraǵaıǵa aparatyn Osınov asýyn aınalyp ótetin jol qurylysy 1 qyrkúıekke deıin aıaqtalmaq.

Halyq aıaqtalýyn 9 jylǵa jýyq ýaqyt kútken joba máresine jetýge taıaý. Alaıda joldaǵy kólik qozǵalysy ondaǵy kópir qurylysy aıaqtalǵan soń ǵana ashylady.

Qaǵazbastylyqqa tusaýlanǵan qurylys

Jol qurylysy 2017 jyly bastalyp, 3 jylda aıaqtalady dep josparlanǵan edi. Alaıda orman qoryna tıesili jer telimderin rásimdeýdegi qıyndyqtarǵa baılanysty merdiger kompanııa jobany iske asyrýdan bas tartty. Keıin ınflıatsııa, jobadaǵy ózgerister men uzaqqa sozylǵan kelisimder joldy oblystaǵy eń uzaqqa sozylǵan qurylysqa aınaldyrdy. Turalap qalǵan qurylys jumystary tek 2023 jyldyń qarashasynda qaıta jandandy.

- Qazir jumys eki ýchaskede - 56-72 shaqyrym jáne 72-88 shaqyrym aralyǵynda júrip jatyr. Birinshi ýchaskede asfalt tóselip bitýge jaqyn, ekinshisinde jumystar endi bastaldy. Barlyq tehnıka men jumys kúshi sonda jumyldyrylǵan. Naqty aıtqanda, 90-ǵa jýyq tehnıka men 70-ten astam maman bar, qarjylandyrý turaqty, - dedi «QazAvtoJol» AQ ShQO fılıalynyń dırektory Nurbek Temirhanov.

Balamasy joq kópir

Jobanyń eń kúrdeli bóligi - Pıhtovka shatqalynan ótetin kópir qurylysy. Onyń uzyndyǵy - 175 metr, al tireýish bıiktigi - 42 metr. Bul Qazaqstandaǵy eń bıik kópir bolmaq.

- Bul elimizde balamasy joq ınjenerlik qurylym. Qurylys bıik taýly jerde, qubylmaly aýa raıy jaǵdaıynda júrgizilip jatyr. Barlyq qaýipsizdik erejeleri saqtalǵan. Qazir tireýishterge arnalǵan shuńqyrlar qazylyp, irgetastyń tómengi bóligine beton quıylyp jatyr. Sonymen qatar gıdrooqshaýlaý jáne qaıta kómý jumystary júrgizilýde. 8 tireýishtiń 6-y boıynsha jumys istelyp jatyr, - dedi merdiger kompanııa ókili Beısenáli Orynbekov.

Onyń aıtýynsha, aýa raıy qolaıly bolsa, negizgi qurylys jyl sońyna deıin aıaqtalady.

Sapa – basty nazarda

Kópir qurylysy - únemi sapa boıynsha erekshe baqylaýda turatyny belgili. Jol aktıvteri sapasynyń ulttyq ortalyǵy ShQO fılıalynyń mamandary beton sapasyn jiti tekserýde. Sondaı-aq jol jamylǵysy da muqııat qadaǵalaýǵa alynǵan.

- Qurylys barysyna jeti ret tekserý júrgizilip, ártúrli markaly betonnan 17 synama alyndy. Eki eskertý berilip, qazir merdiger solar boıynsha tıisti sharalar qabyldap jatyr. Jumystyń ár kezeńi baqylaýda. Bir ýchaske daıyn bolǵan sátte zerthana mamandary sonda shyǵyp, synama alady. Eger qandaı da bir talapqa sáıkessizdik anyqtalsa - merdiger óz esebinen bárin qaıta jasaıdy. Bul - ýaqytty únemdeý ári sapa kepildigi úshin, - dedi fılıal dırektory Erjan Aıazbaev.

Joldyń strategııalyq mańyzy men týrızmge paıdasy

Bul jol Óskemendi - Katonqaraǵaı, Úlken Naryn, Altaı jáne Glýbokoe aýdandarymen baılanystyryp tur. Jaz kezinde jolmen táýlik saıyn 20 myńǵa jýyq kólik júredi.

- Jańa jol - kólik qatynasyn jaqsartýmen qatar, týrızmniń damýyna serpin beredi. Jol boıynda sanıtarlyq toraptar ornatylmaq. Olardyń tazalyǵy baqylaýda bolady, - degen edi taıaýda ShQO ákimi Nurymbet Saqtaǵanov týrızm salasy boıynsha ótken jınalysta.

«QazAvtoJol» kompanııasynyń málimetinshe, 2023-2024 jyldary jobaǵa 7,9 mlrd teńge bólinse, 2025 jylǵa 5,3 mlrd teńge josparlanǵan. Onyń 6,2 mlrd-y ekinshi ýchaskege jumsalmaq.

- Jumystar kestege sáıkes júrip jatyr. Bıyl jol jamylǵysy men kópirdi tolyq aıaqtaımyz. Joldy qarasha aıyna paıdalanýǵa berý josparlanǵan, - dedi Nurbek Temirhanov.

Eger jumystar josparǵa saı aıaqtalsa, aldaǵy qysqa qaraı halyq Shyǵys Qazaqstannyń eń kórikti jerlerine jańa, qaýipsiz jolmen jetedi.

Eske salsaq, buǵan deıin Katonqaraǵaı men Marqakól arasyn jalǵaıtyn avstrııalyq joldaǵy kópir jóndeletindigi habarlanǵan.