«Saq stılindegi» jańa dızaındaǵy nomınaly 5 000 teńgelik banknota aınalymǵa shyqty
ASTANA. KAZINFORM — Qazaqstan Ulttyq Banki jańa dızaında shyqqan nomınaly 5 000 teńgelik banknotalardy 2023 jyly 25 jeltoqsanda aınalymǵa shyǵardy. bul týraly Ulttyq banktiń baspasóz qyzmeti málim etti.
Bul – «Saq stıli» jańa serııasynyń alǵashqy banknotasy. Ol qazaqy oıý-órnektiń bastaý negizi sanalatyn jáne kóshpendilerdiń biregeı mádenıetinen bastap búgingi Qazaqstanǵa deıingi el murasyn beıneleıtin «Saq stıli» elementterine negizdelgen.
QUB shynaıy banknotalardy jalǵan aqshadan óz betinshe ajyratýǵa kómektesetin qarapaıym erejeler bar ekenin eske salady jáne 2023 jylǵy úlgide shyqqan jańa dızaındaǵy 5 000 teńgelik banknotalardyń qorǵanysh elementterin usynady.
Aqsha belgisiniń qorǵanysh elementteri týraly
Banknotada relefti qalyptastyratyn – altyn ıntaglıo arnaıy baspa tásili qoldanylǵan. Qazaqstan Respýblıkasynyń eltańbasy altyn metall boıaýdyń joǵary bederli qabatymen basylǵan.
Banknotanyń bet jaǵyndaǵy shetterinde shyǵyńqy, joǵary relefti elementter bar, olar qolmen ustaǵanda jaqsy seziletin – kórý qabileti nashar adamdarǵa arnalǵan belgi.
Banknota betinde úzik-úzik túrinde shyǵyp turǵan eki tústi qorǵanysh jip te bar. Ol jaryq túskende bir tutas jip retinde anyq kórinedi. Banknotanyń kólbeý buryshy ózgergen kezde qyzyl jáne kók tústerdiń ózara árekettesýinen dınamıkalyq lúpildiń áseri paıda bolady.
Sonymen qatar, banknotanyń bet jaǵynda kólemdi stıldendirilgen «Búrkit» beınesi túrindegi patch qorǵanysh elementi ornalasqan. Banknotany aýdarǵan kezde nomınaldyń tsıfrlyq keskininen oıý-órnekke aýysý áseri jáne kún belgisi sáýleleriniń jan-jaqqa shashyraǵan dınamıkalyq áseri baıqalady.
Jeke kórkemdik elementter banknotaǵa altyn tústes jyltyraǵy bar arnaıy – ırıdıstsentti boıaý qoldanyp basylǵan.
Lokaldy sý belgisi qorǵanysh elementi – elektrotıp. Jaryq túskende nomınaldyń beınesinen turatyn elektrotıp belgisi anyq kórinedi.
Banknotanyń ekinshi betinde «Búrkit» artefaktiniń kólemdi beınesi túrindegi Spark elementi ornalasqan. Banknotanyń kólbeý buryshy ózgergen kezde Spark túsi altynnan nefrıt túsine ózgeredi.
Mundaı tekserý tásilderi birneshe sekýnd ýaqytty alady jáne kez kelgen adamǵa banknotanyń túpnusqalyǵyn anyqtaýǵa kómektesedi.