«Saq stılindegi» nomınaly 500 teńgelik banknotalar aınalymǵa shyqty
ASTANA. KAZINFORM — Qazaqstan Ulttyq banki 2025 jylǵy 25 jeltoqsannan bastap jańa dızaındaǵy nomınaly 500 teńgelik banknottardy aınalymǵa shyǵaratyn boldy.
Bank málimetine sáıkes, bul «Saq stıli» serııasymen shyqqan besinshi banknota. Ol kóshpendiler mádenıetinen búgingi Qazaqstannyń biregeı murasyn qamtyp, dástúrli qazaqy oıý-órnektiń túp tamyry sanalatyn «Saq stıli» elementterine negizdelgen.
— Jańa banknota 2026 jyldyń ekinshi toqsanynda jappaı qoldanysqa shyǵa bastaıdy. Sebebi aqshany elimizdiń barlyq óńirine jetkizý úshin jáne bankomattar, termınaldar jáne basqa kassalyq tehnıka tárizdi jabdyqtardy beıimdeý úshin qosymsha ýaqyt qajet, — dep atap ótti vedomstvo.
Banknottardyń túsi — kók. Onyń bet jaǵynda myna zattar beınelengen:
— kókte qalyqtaǵan quspen «Báıterektiń» butaǵy (Esik qorǵany, b. z. d. 5-4 ǵǵ., Altyn adam bas kıiminiń áshekeıi, tabıǵat pen nanym baılanysynyń qasıetti maǵynasy);
— DNQ spıralin jáne adamnyń tabıǵatpen baılanysyn bildiretin oıý-órnekpen bezendirilgen sheksizdik sımvoly;
— artefakt — Arqardyń basy túrindegi áshekeıdiń fragmenti (Berel qorǵany, b. z. d. 8-7 ǵǵ., ShQO).
Al banknottyń artqy jaǵynda:
— oıý-órnekpen kómkerilgen qalqan aıasynda beınelenip turǵan Qazaqstanda mekendeıtin Arqar;
— negizgi beıneniń artynda birneshe maǵyna beretin qazaqy oıý-órnek ornalasqan:
• «Qalqan» — qundylyqtar qorǵanyn bildiredi,
• ejelgi sımvol — dúnıeniń tórt qubylasy,
• ortasynda jasampaz energııanyń nyshany retinde kún belgisi beınelengen.
— banknottyń ortasynda qazaqı «sheksizdik» oıý-órneginiń kontýry salynyp, onyń ishinde «Muztaý» taýynyń landshaftyq kórinisi beınelengen.
— Nomınaly 500 teńgelik jańa banknottar 2025 jylǵy 25 jeltoqsannan bastap aınalysqa engiziledi jáne aınalysta júrgen 2017 jylǵy úlgidegi nomınaly 500 teńgelik ulttyq valıýta banknottarymen (budan ári — eski úlgidegi banknot) eki jyl boıy aýystyrylady. ıAǵnı, eski úlgidegi barlyq banknot eki jyl ishinde aınalystan birtindep alynady. Tıisinshe, osy kezeńde ekinshi deńgeıdegi bankterge (budan ári — EDB) nemese QUB fılıaldaryna baryp, eski úlgidegi banknottardy jańa banknottarǵa aıyrbastaýy qajet emes, — delingen habarlamada.
Jańa jáne eski úlgidegi banknottardyń aınalysta qatar júrý kezeńi 2025 jylǵy 25 jeltoqsannan bastap 2027 jylǵy 24 jeltoqsanǵa deıingi aralyqty qamtıdy.
Bul kezeń aıaqtalǵan soń, ıaǵnı 2027 jylǵy 25 jeltoqsannan bastap, barlyq bank pen Qazposhtada eski úlgidegi banknottardy 3 jyl ishinde, ıaǵnı 2030 jylǵy 24 jeltoqsanǵa deıin jańa úlgidegi banknottarǵa aıyrbastaýǵa múmkindik bar. Al QUB fılıaldarynda olardy merzimsiz aıyrbastaýǵa bolady.
— Jańa úlgidegi (2025 jylǵy) jáne eski úlgidegi (2017 jylǵy) banknottar aınalysta qatar júretin kezeńde zańdy tólem quraly bolyp sanalady. Tólemder men aýdarymdardyń barlyq túrin júzege asyrý úshin, bank shottaryna aýdarý úshin Qazaqstan Respýblıkasynyń búkil aýmaǵynda olardy qunyna qaraı qabyldaýnýy mindetti ekenin atap ótemiz. Jańa banknottar elimizdegi QUB-nyń barlyq fılıalynda, Qazposhtada, ekinshi deńgeıdegi bankterde jáne Qazaqstandaǵy beırezıdent bankterdiń fılıaldarynda shekteýsiz aıyrbastalady jáne aýystyrylady. Zańdy tólem quralyna jatatyn banknottar men monetalardy qabyldaýdan bas tartý Qazaqstan Respýblıkasynyń Ákimshilik quqyq buzýshylyq týraly kodeksine sáıkes ákimshilik quqyq buzýshylyq bolyp sanalatynyn eske salamyz, — dep túıindedi banktiń baspasóz qyzmeti.
Budan buryn Ulttyq bank «Saq stıli» jańa serııasynan nomınaly 10 000 teńgelik banknotalardy aınalymǵa shyǵaratynyn jazǵanbyz.