«Saq stılindegi» banknota: Kúzde jańa 10 000 teńgelikter jappaı taralady
ASTANA. KAZINFORM – QR Ulttyq banki Qolma-qol aqsha aınalysy departmenti jobasynyń bas dızaıner-mamany Sanjar Nurqasymov «Saq stıli» jańa serııasynan nomınaly 10 000 teńgelik banknotalar adamdardyń qolyna qashan tıetinin naqtylady.
Bul «Saq stıli» jańa serııasynan ekinshi banknota. Ol qazaqy oıý-órnektiń bastaý negizi sanalatyn jáne kóshpendilerdiń biregeı mádenıetinen bastap búgingi Qazaqstanǵa deıingi el murasyn beıneleıtin «Saq stıli» elementterine negizdelgen.
«Bul jańa banknotalar kúzge qaraı jappaı taralady. Aldaǵy kúnderi aınalymǵa shyqqannan keıin, ekinshi deńgeıdegi bankter ony adaptatsııaǵa alady. ıAǵnı búkil kassalyq tehnıka, bankomattar men termınaldar jańa aqshaǵa qatysty tıisti beıimdeýden ótkennen keıin, shamamen qyrkúıek aıynda el halqynyń qolyna tıedi. Jalpy, jappaı taralym boıynsha Ulttyq bank resmı jarııalaıdy», - dedi S. Nurqasymov.
Atap aıtqanda, nomınaly 10 000 teńgelik jańa banknotalar 2024 jylǵy 28 maýsymnan bastap aınalymǵa enedi jáne aınalymda júrgen 2012 jylǵy úlgidegi nomınaly 10 000 teńgelik ulttyq valıýta banknotalarymen (budan ári – eski úlgidegi banknota) eki jyl boıy aýystyrylady.
ıAǵnı, eski úlgidegi barlyq banknota eki jyldyń ishinde aınalymnan birtindep alynady. Tıisinshe, banknotalar aınalymda qatar júrgen ýaqytta halyqqa eski úlgidegi banknotalardy ekinshi deńgeıli bankterdegi nemese QUB fılıaldaryndaǵy jańa banknotalarǵa aıyrbastaýdyń qajeti joq. Jańa jáne eski úlgidegi banknotalardyń aınalymda qatar júrý kezeńi 2024 jyldyń 28 maýsymnan 2026 jyldyń 28 maýsymyna deıingi aralyqty qamtıdy.
