Saq stıli: nomınaly 2 000 teńgelik jańa serııaly banknotalar aınalymǵa shyǵady
ASTANA. KAZINFORM – Qazaqstan Ulttyq Banki 2024 jylǵy 25 jeltoqsanda 2024 jylǵy úlgidegi jańa dızaınmen nomınaly 2 000 teńgelik banknotalardy aınalymǵa shyǵarady. Bul týraly banktiń baspasóz qyzmeti málim etti.
Bul «Saq stıli» jańa serııasynan úshinshi banknota. Ol qazaqy oıý-órnektiń bastaý negizi sanalatyn jáne kóshpendilerdiń biregeı mádenıetinen bastap búgingi Qazaqstanǵa deıingi el murasyn beıneleıtin «Saq stıli» elementterine negizdelgen.
Banknotalar jappaı qoldanysqa 2025 jyldyń ekinshi toqsanynda berile bastaıdy. Sebebi olardy elimizdiń barlyq aımaǵyna jetkizý úshin jáne jabdyqtardy (bankomattar, termınaldar jáne basqa da kassalyq tehnıkalar) beıimdeý úshin qosymsha ýaqyt qajet.
Aqsha belgisiniń dızaıny men formasy týraly
Banknotalardyń túsi – jasyl.
Banknotanyń bet jaǵynda:
– kókte qalyqtap ushqan quspen «Ómir aǵashynyń» butaǵy (Esik qorǵany, b. d. d. 5-4 ǵǵ., Altyn adam bas kıiminiń bir bóligi, tabıǵat pen nanym baılanysynyń qasıetti maǵynasy);
– DNQ spıralin jáne adamnyń tabıǵatpen baılanysyn bildiretin oıý-órnekpen stıldendirilgen sheksizdik sımvoly;
– artefakt – molshylyq pen baılyqtyń sımvoly retinde múıizdi janýardyń beınesi (Qyzyltoǵan qorǵany, b.z.d. 7-6 ǵǵ., Jetisý).
Artqy jaǵynda
– oıý-órnekpen bezendirilgen qalqannyń fonynda aqbókender;
– «Qalqandy» beıneleıtin dóńgelek qazaq oıý-órnegi - qundylyqtardy qorǵaýdyń sımvoly, ejelgi sımvol – álemniń tórt qyry, ortalyqtaǵy kún belgisi Jasampaz energııa men ómirdiń sımvoly retinde.
Sondaı-aq, banknotanyń syrt jaǵynda artefakt – aqbókenniń basy beınelengen (№4 qorǵan, b.d. d. 7 ǵǵ., Qazaqstan, Torǵaı oblysy Qostanaı ýeziniń Danbar bolysynan tabyldy). Banknotanyń ortasynda fon retinde qazaq oıý-órnegindegi «sheksizdik» kontýry bar, onyń ishinde Býrabaı kóliniń beınesi beınelengen.
Banknotalardy aıyrbastaý jáne aınalymda qatar júrý kezeńin belgileý tártibi týraly
Nomınaly 2 000 teńgelik jańa banknotalar 2024 jylǵy 25 jeltoqsannan bastap aınalymǵa enedi jáne 18 aı boıy aınalystaǵy 2012 jylǵy úlgidegi 2 000 teńgelik ulttyq valıýta banknotalarymen (budan ári – eski úlgidegi banknota) aýystyrylady.
ıAǵnı, eski úlgidegi barlyq banknota bir jarym jyldyń ishinde aınalymnan birtindep alynady. Tıisinshe, banknotalar aınalymda qatar júrgen ýaqytta halyqqa eski úlgidegi banknotalardy ekinshi deńgeıli bankterdegi nemese QUB fılıaldaryndaǵy jańa banknotalarǵa aıyrbastaýdyń qajeti joq.
Jańa jáne eski úlgidegi banknotalardyń aınalymda qatar júrý kezeńi 2025 jyldyń 25 jeltoqsannan 2026 jyldyń 24 maýsymyna deıingi aralyqty qamtıdy.
Ol kezeń aıaqtalǵannan keıin, ıaǵnı 2026 jylǵy 24 maýsymnan bastap barlyq bank pen Qazposhtada eski úlgidegi banknotalardy 3 jyl ishinde, ıaǵnı 2029 jylǵy 25 maýsymǵa deıin jańa úlgidegi banknotalarǵa aıyrbastaýǵa múmkindik bar. Al QUB fılıaldarynda merzimsiz aıyrbastaýǵa bolady.
Jańa úlgidegi (2024 jylǵy) jáne eski úlgidegi (2012 jylǵy) banknotalar aınalymda qatar júretin kezeńde zańdy tólem quraly bolyp sanalady. Tólemder men aýdarymdardyń barlyq túrin júzege asyrý úshin, bank shottaryna aýdarý úshin Qazaqstan Respýblıkasynyń búkil aýmaǵynda olardy ataýly qunyna qaraı qabyldaýǵa mindetti ekenin atap ótemiz.
Olar elimizdegi QUB, Qazposhta jáne ekinshi deńgeıli bankterdiń barlyq fılıalynda, sondaı-aq Qazaqstandaǵy beırezıdent bankterdiń fılıaldarynda shekteýsiz aıyrbastalady jáne aýystyrylady.
Zańdy tólem quralyna jatatyn banknotalar men monetalardy qabyldaýdan bas tartý Qazaqstan Respýblıkasynyń Ákimshilik quqyq buzýshylyq týraly Kodeksine sáıkes ákimshilik quqyq buzýshylyq bolyp sanalatynyn eske salamyz.
Eske sala keteıik, buǵan deıin Ulttyq bank «Saq stıli» jańa serııasynan nomınaly 10 000 teńgelik banknotalardy aınalymǵa shyǵarǵanyn jazǵan edik.