Saq mádenıeti: «Altyn adam» álemdi aralaıdy

ASTANA. QazAqparat - Qazaq jerinen tabylǵan «Altyn adam» alǵash ret shetelge shyǵaryldy. Endi uly dalanyń tósin kezgen kóshpendilerdiń óneri kúlli jahanǵa kórsetiledi, dep jazady Habar 24.

«Altyn adam» álem mýzeılerin aralaıdy» dep atalatyn halyqaralyq jobanyń aldymen at basyn burǵan óńiri - Belarýs Respýblıkasy.

Bul eldegi ulttyq kórkemóner mýzeıinde Qazaqstannan ákelingen jaýhar jádigerler qoıyldy. Kórme ashylmaı jatyp-aq jurt ony álem ónerindegi basty shara dep baǵalap úlgerdi. Belarýs astanasyndaǵy Kórkem murajaıdyń basty zalyna qoıylǵan jádigerler teńdesi joq biregeı.

Munda 232 eksponat pen saf altynnan jasalǵan 120 áshekeı bar. Halyqaralyq joba eldiń mádenı ómirindegi basty sharaǵa aınaldy. Óıtkeni bizdiń zamanymyzǵa deıingi VII ǵasyrdaǵy, ıaǵnı temir dáýirindegi asyl buıymdar adamzat tarıhyndaǵy eń ejelgi jádigerler bolyp sanalady.

«Bular - túpnusqalar. Meniń oıymsha, bizdiń kórermender bul jádigerlermen alǵash ret tanysaıyn dep otyr. Tipti búkil TMD elderiniń ishinde birinshi desem de bolady. Al myna «Altyn adam» - kórmeniń basty jádigeri. Ol qazir qala kósheleriniń barlyq jarnamalyq taqtasynda ilinip tur. Óıtkeni soǵan laıyq. Saq altyndary 1969 jyly Almatyǵa jaqyn jerde tabyldy. Saq kóseminiń jerlengen ornyn áıgili qazaqstandyq arheolog Kemel Aqyshev bastaǵan ekspedıtsııa ashty. Qolbasshynyń bas jáne ústińgi kıiminiń áshekeıleri sol qalpynda saqtalǵan. Bul «Altyn adamdy» jınap, qurastyrýǵa múmkindik berdi», - deıi Belarýs Ulttyq kórkem murajaıynyń jetekshi ǵylymı qyzmetkeri Alla Gavrılova.