Saq kınostýdııasynyń mýltfılmderi balalarǵa tegin kórsetiledi
ASTANA. QazAqparat - Astananyń 20 jyldyq mereıtoıy qarsańynda elordada Ońtústik Qazaqstan oblysynyń mádenı kúnderi bastaldy, dep habarlaıdy QazAqparat tilshisi.
Úsh kúndik shara aıasynda astanalyq balǵyndarǵa Ońtústik Qazaqstannyń tarıhı-kıeli jerlerin nasıhattaıtyn mýltfılmder kórsetý josparlanǵan.
«Bıyl Astana ákimdigi jyldaǵydaı óńirlerdi arnaıy shaqyrǵan joq. Dese de, OQO ákimdigi bastama kóterip, elorda halqyna úsh kún boıy mádenı sharalardy usynady. Oqýshylar saraıynda jáne qaladaǵy birqatar balabaqshalarda «Saq» kınostýdııasy túsirgen anımatsııalyq fılmderdiń kórsetilimi ótedi. Ótken jyly bul stýdııa «Kúsh atasy - Qajymuqan», «Otyrardy qorǵaý», «Kıeli Qazyǵurt» atty 3 anımatsııalyq fılm men 10 serııaly «Kóne jetigen syry» telehıkaıasy túsirgen bolatyn. Jyl basynda bul jobalar Ońtústik Qazaqstan oblysynyń barlyq aýdan-qalalarynda kórsetildi, dıskileri taratyldy. Endi elordalyq balalarǵa tartý retinde ákelip otyrmyz», - dedi OQO Mádenıet jáne tilderdi damytý basqarmasy basshysynyń mindetin atqarýshy Asylhan Temirhan Oqýshylar saraıynda ótken anımatsııalyq fılmder kórsetiliminde.
«Otyrardy qorǵaý» fılminde ańyzǵa aınalǵan kóne Otyrar qalasynyń turmys-tirshiligi men mádenıeti eki balanyń hıkaıasy arqyly sýretteledi. Al «Kıeli Qazyǵurt» - Nuq paıǵambar kemesiniń Qazyǵurtqa toqtaýy týraly ańyzdy baıandaıdy. Mýltfılmderdi «Balapan» telearnasy arqyly barsha respýblıka balalaryna kórsetý josparlanǵan.
Budan bólek, 2018 jyly Ońtústik Qazaqstan oblysy ákimdiginiń qoldaýymen «Tóle bı» 10 serıaly kınohıkaıasyn, «Túrkistan», «Oqsyz oqıǵasy», «Ordabasy - birliktiń týy» atty anımatsııalyq fılmder túsirilip jatyr. Tórt joba da jyl sońyna deıin aıaqtalyp, kórermen nazaryna usynylmaq.
Ákimdik ókiliniń aıtýynsha, Astanadaǵy OQO mádenı kúnderi aıasynda 19 maýsymda Kongress Holl foıesinde úlken keshendi kórme uıymdastyrylady. Keshki 19:00-de «Asqaqtaı ber, Astana» atty ońtústikqazaqstandyq óner sheberleriniń merekelik kontserti ótedi. Sonymen birge, 20 maýsym kúni Etnoaýylda «Sharyqtaı ber, Ońtústiktiń ánderi-aı» úlken merekelik kontsertpen mádenı sharalar legi jabylady.
Aıta keteıik, Saq kınostýdııasy «Tompaq», «Qalqanqulaq» serıaldarymen, «Qazaq eli», «Teke men Qoshqar» anımatsııalyq fılmderimen tanymal. Búginge deıin kınostýdııa 60-qa jýyq anımatsııalyq jáne 6 tolyqmetrajdy fılm túsirgen.
