Saırov el birligi týrasynda: jastarǵa rýshyldyq psıhologııany tańatyn kontent shekten shyqty
ASTANA. KAZINFORM — Rýshyldyq tendentsııa - qoǵam ishinde memlekettik oılaý qabiletin korrozııaǵa ushyratyp, memlekettilikti shashyratýǵa ákeletin qaýipti qubylys. Bul týraly Májilis depýtaty Erlan Saırov málim etti.
- Ata-babamyzdyń qaıtpas qaısarlyǵy men qajymas kúresiniń nátıjesinde kelgen Táýelsizdikti saqtap turý úshin bizge birlik, tutastyq, yntymaq qajet. Alaıda sońǵy kezderi qoǵamda birlik pen tutastyqty nyǵaıtýdan góri, halyqty jikke bólýge beıim úderis kúsheıip keledi. Jekelegen kontent óndirýshiler men kásipkerler rýlyq sanany jalaýlatyp, kúndelikti tutynatyn fýtbolka men shapandarǵa rý ataýyn jazyp, olardy «brend» nemese «marketıngtik ónim» retinde satylymǵa shyǵaryp jatyr. Áleýmettik jelilerde jastarǵa rýshyldyq psıhologııany tańatyn kontent shekten shyǵyp ketti, - dedi E. Saırov Úkimet basshysynyń atyna joldaǵan depýtattyq saýalynda.
Onyń aıtýynsha, ulttyń birligin ishinen qurtatyn qaýipti tendentsııa kınoǵa da jetti.
- Jýyrda «Rýyń kim?» degen fılm prokatqa shyǵypty. Bul arqyly kıno túsirýshilerdiń ne aıtpaq bolǵany túsiniksiz?! Tipti, bul fılmdi jarnamalaý úshin jasalǵan arnaıy ekzpozıtsııada rýǵa bólinýdi qoıyp, Qazaqstannyń kartasyn úsh júzge bólip qoıǵandy kórdik. Bul ne degen bassyzdyq? Birtutas memleket ıdeıasy qaıda? Qazaqtyń rýlaryn salystyratyn, kemsitetin fılmderdiń maqsaty qandaı?Ol – ult úshin eń sezimtal taqyrypty aıqaılatyp áleýmettik kontent, kıno taqyrybyna aınaldyryp, kórermen jınaý. Túbi - bul jaqsylyqqa ákelmeıdi. Tvorchestvolyq bostandyq qajet. Biraq tvorchestvolyq bostandyq myna alaı-dúleı zamanda ulttyń birligin buzyp, memlekettiliktiń tamyryn qııýǵa qabiletti deńgeıge shyqpaýy tıis.
Jasóspirimder úshin kıno jáne medıakontenttiń tárbıelik yqpaly joǵary ekenin eskersek, bul máselege beıjaı qaraýǵa bolmaıdy. Rýshyldyq tendentsııa - qoǵam ishinde memlekettik oılaý qabiletin korrozııaǵa ushyratyp, memlekettilikti shashyratýǵa ákeletin qaýipti qubylys, - dedi depýtat.
Osyǵan baılanysty E. Saırov kelesi sharalardy qabyldaýdy usyndy: 1. Aqparat jáne mádenıet mınıstrligi janynan kınoprokatqa shyǵatyn otandyq fılmderdiń mazmunyn aldyn ala kórkemdik-estetıkalyq, ıdeologııalyq, ulttyq birlik turǵysynan saraptaıtyn turaqty komıssııa qurýdy iske asyrý qajet. 2. «Ulttyq kod» jáne «mádenı erekshelik» uǵymyn jeleý etip, qoǵamdy bólshekteýge, rýshyldyq pen jikshildikti nasıhattaıtyn áreketterge naqty tosqaýyl qoıý kerek.3. Mádenı salada, áleýmettik jelide Qazaqstannyń barlyq halyqtarynyń birligin kórsetetin, jalpyulttyq «Biz Qazaqpyz» degen maǵynadaǵy kontentti kóbeıtýge kirisý qajet.
Buǵan deıin Mádenıet jáne aqparat mınıstri Aıda Balaevaonomastıkada jershildik pen rýshyldyqqa jol berilmeıtinin aıtqan edi.