Saırov: Memlekettik til týraly norma — el turaqtylyǵynyń negizi

ASTANA. KAZINFORM — Qazaqstannyń damýy úshin memlekettiń ishki turaqtylyǵy mańyzdy. Bul týraly Kazinform tilshisine bergen suhbatynda QR Parlamenti Májilisiniń depýtaty Erlan Saırov aıtty.

— Konstıtýtsııanyń 9-babynyń 1-tarmaǵynda Qazaqstan Respýblıkasynyń memlekettik tili — qazaq tili dep naqty kórsetilgen. Bul — negizgi postýlat. Qazirgi jaǵdaıǵa nazar aýdaratyn bolsaq, orta mektepte bilim alyp jatqan oqýshylardyń shamamen 70 paıyzy qazaq tilinde oqıdy. Joǵary oqý oryndarynda da qazaq tilinde bilim alatyn stýdentterdiń úlesi 70 paıyzǵa jetken. Sonymen qatar, búginde Qazaqstan halqynyń quramyndaǵy qazaqtardyń úlesi 70 paıyzdan asty. Bul derekter memlekettik tildiń damýyna barlyq múmkindik bar ekenin kórsetedi, — deıdi májilismen.

Depýtat qazaq tiliniń bolashaǵyna qatysty da pikir bildirdi.

— Qazirgi kúrdeli geosaıası ahýal men ýaqyt talabyn eskere otyryp, Qazaqstannyń táýelsizdigin aldaǵy uzaq jyldarǵa saqtap qalý úshin el ishindegi turaqtylyqty qamtamasyz etetin tetikterdi qalyptastyrý qajet. Konstıtýtsııada memlekettik tildiń qazaq tili retinde bekitilýi — basty qaǵıda. Al basqa tirkester memlekettiń tutastyǵy men ishki turaqtylyǵyn saqtaýǵa baǵyttalǵan belgili bir mehanızmder retinde qarastyrylýy tıis. Aldaǵy 10-15 jylda qazaq halqynyń eldegi úles salmaǵy 80-85 paıyzǵa jetýi múmkin. Sol kezde memlekettik tildiń qoǵamdaǵy orny tolyq ári myzǵymaı ornyǵady, — deıdi Erlan Saırov.

Aıta keteıik, Májilis depýtaty, «Aq jol» demokratııalyq partııasynyń tóraǵasy Azat Perýashev jańa reformaǵa oń baǵasyn berdi.