Saıda Mırzıeeva Ózbekstan Prezıdenti Ákimshiliginiń basshysy laýazymyn ıelendi
TAShKENT. KAZINFORM – Shavkat Mırzıeevtiń jarlyǵymen Prezıdent Ákimshiliginiń basshysy laýazymy qaıta jasaqtaldy. Tıisinshe, endi oǵan buryn memleket basshysynyń kómekshisi bolǵan Saıda Mırzıeeva jetekshilik etedi, dep habarlaıdy Kazinform agenttiginiń menshikti tilshisi.
Taǵaıyndaý týraly Ózbekstan basshysynyń baspasóz hatshysy Sherzod Asadov málim etti.
2023 jyldyń tamyz aıynan bastap Saıda Mırzıeeva prezıdenttiń kómekshisi qyzmetin atqaryp keldi. Al 2022 jyldyń qarasha aıynan bastap ol Prezıdent Ákimshiligi atqarýshy apparatynyń kommýnıkatsııalar jáne aqparattyq saıasat sektorynyń meńgerýshisi boldy.
Saıda Mırzıeeva — Ózbekstandaǵy álemdik ekonomıka jáne dıplomatııa ýnıversıtetiniń túlegi, Tashkent memlekettik zań ýnıversıteti, sondaı-aq M.Lomonosov atyndaǵy Máskeý memlekettik ýnıversıtetiniń magıstri, ekonomıka ǵylymdarynyń kandıdaty.
Toqtala keteıik, Shavkat Mırzıeev 2023 jyldyń tamyzynda Ózbekstan Prezıdenti Ákimshiliginiń qurylymyna reforma jasady. Keıin Prezıdent Ákimshiliginiń basshysy laýazymy joıyldy.
Sáıkesinshe, prezıdent kómekshileriniń qatary kóbeıdi.
Eske salaıyq, 2022-2023 jyldar aralyǵynda Prezıdent Ákimshiligin Sardor Ýmýrzakov basqardy.